اسلام آباد (این این آئی) پاکستان کرکٹ ٹیم کے کپتان سرفراز احمد نے کہا ہے کہ شعیب اختر نے مجھ پر تنقید نہیں کی بلکہ ذاتی حملے کئے ہیں،جو غلطی کی اس کی سزا مل گئی ہے۔انٹرنیشنل کرکٹ کونسل (آئی سی سی) کی طرف سے 4 میچز کی معطلی کے بعد قومی ٹیم کے کپتان سرفراز احمد جنوبی افریقہ سے کراچی پہنچ گئے۔ اس موقع پر ایئر پورٹ پر سرفراز احمد کے مداحوں نے پلے کارڈ اٹھا رکھے تھے جن پرقومی ٹیم کے کپتان کے حق میں نعرے

درج تھے۔میڈیا سے گفتگو میں سرفراز احمد نے کہا کہ جو غلطی کی اس کی سزا مل گئی ہے، جنوبی افریقہ میں ایک میچ کیلئے رکنے سے کوئی فرق نہیں پڑنا تھا۔ سابق فاسٹ باؤلر شعیب اختر کی طرف سے کی جانیوالی تنقید کے سوال پر قومی کرکٹ ٹیم کے کپتان سرفراز احمد نے کہا کہ شعیب اختر نے مجھ پر تنقید نہیں کی بلکہ ذاتی حملے کئے ہیں۔ انہوں نے کہا کہ پانچ ماہ سے کرکٹ کھیل رہا ہوں اچھا ہے پی ایس ایل سے پہلے کچھ آرام مل جائیگا۔