ممبئی (این این آئی) بالی ووڈ اداکارہ تبو نے کہا ہے کہ بالی ووڈ اب 20 سال پہلے جیسا نہیں رہا، گزشتہ چند سال میں فلم انڈسٹری میں حیران کن تبدیلی آئی ہے اور خصوصی طور پر آخری 5 سال میں بہت کچھ بدلا ہے۔ایک انٹرویو میں بالی ووڈ اداکارہ نے کہا کہ اس وقت جس طرح کی فلمیں بالی ووڈ میں بن رہی ہیں یا جس طرح کے کردار بنائے جا رہے ہیں، پہلے ایسے کردار نہیں بنائے جاتے تھے۔

انہوں نے کہاکہ اگر 2 دہائیاں پیچھے مڑ کر دیکھا جائے تو بالی ووڈ میں ایسی فلموں کی بھرمار نظر آئیگی جس میں ہیرو یا ہیروئن کا کردار ہی اہم ہوتا تھا، تاہم اب ایسا نہیں ہے۔ انہوں نے اعتراف کیا کہ اب کسی بھی فلم کی کامیابی کا کریڈٹ ہیرو یا ہیروئن کو نہیں بلکہ مجموعی کاسٹ کو جاتا ہے ۔انہوں نے کہاکہ 20 سال قبل نئے اداکار ایسے کردار کرنے کو تیار نہیں ہوتے جو مختصر ہوں۔انہوں نے کہا کہ اس وقت نئی نسل کے اداکار ہر طرح کا مختصر یا منفی کردار خوشی سے ادا کرتے ہیں اور کوئی بھی ہیرو یا ہیروئن کے کردار کا مطالبہ نہیں کرتا۔انہوں نے کہا کہ تبو نے کہاکہ گزشتہ 5 سال میں بالی ووڈ فلموں کی کہانی، پلاٹ اور کرداروں میں بہت فرق آیا ہے، اب ماضی کی طرح گھسے پٹے یا ہیرو اور ہیروئن کے کرداروں پر مبنی فلمیں نہیں بنائی جاتیں۔ایک سوال کے جواب میں اداکارہ تبو نے کہا کہ 20 سال قبل بھی پوچھا جاتا تھا کہ وہ کس عمر تک اداکاری کرتی رہیں گی اور اب بھی مجھ سے یہی پوچھا جاتا ہے کہ میں کب تک فلموں میں نظر آؤنگی؟ انہوں نے کہا کہ 20 سال قبل اور آج بھی میں فلموں میں دکھائی دیتی ہوں اور آنیوالے وقت میں بھی میں پردے پر جلوے دکھاتی نظر آؤنگی۔ انہوں نے کہا کہ ماضی کے مقابلے میں اب میں منتخب اور خاص فلموں میں کام کرتی ہوں اور آئندہ بھی یہی سلسلہ جاری رہے گا۔ سوشل میڈیا کے حوالے سے ایک سوال کے جواب میں تبو نے کہا کہ میری عمر 16 سال نہیں کہ میں ہر وقت سوشل میڈیا پر چیزوں کو تلاش کرتی رہوں اور اس کے سحر میں کھوئی رہوں، میں اپنی عمر کے حساب سے صحیح ہوں تاہم میں دیگر سوشل میڈیا ویب سائیٹس کی بجائے صرف انسٹاگرام پر موجود ہیں جہاں زندگی کی حسین یادیں مداحوں کے ساتھ شیئر کرتی ہوں۔