اسلام آباد (اے این این) اسلام آباد ہائیکورٹ نے شہبازشریف کی بطور چیئرمین پبلک اکائونٹس کمیٹی تقرری کے خلاف درخواست خارج کردی۔ اسلام آباد ہائیکورٹ میں مقامی وکیل ریاض حنیف کی جانب سے درخواست دائر کی گئی تھی جس میں شہبازشریف کی بطور چیئرمین پبلک اکائونٹس کمیٹی کے تقرر کو چیلنج کیا گیا تھا۔درخواست گزار نے اپوزیشن لیڈر پر نیب ریفرنس کو بنیاد بناتے ہوئے ان کی تقرری کو چیلنج کیا تھا۔اسلام آباد ہائیکورٹ کے چیف جسٹس اطہر من اللہ نے مختصر سماعت کے بعد درخواست

پر فیصلہ 31دسمبر کو محفوظ کیا تھا،چیف جسٹس اطہر من اللہ اور جسٹس محسن اختر کیانی نے فیصلہ سنایاعدالت نے ریمارکس دیے کہ آپ اپنے دلائل سے عدالت کو مطمئن نہیں کر سکے ہیں اور درخواست قابل سماعت ہونے کے میرٹ پر پورا نہیں اترتی ہے۔عدالت نے فیصلہ سناتے ہوئے درخواست کو ناقابلِ سماعت قرار دیتے ہوئے خارج کردیا۔دوسری جانب شہبازشریف نے عدالتی فیصلے پر رد عمل میں اطمینان کا اظہار کرتے ہوئے کہا کہ عدالت عالیہ کا شکریہ جس نے یہ فیصلہ دیا۔