اسلام آباد(سی پی پی ) العزیزیہ اسٹیل ملز ریفرنس میں سزا معطلی کے لیے سابق وزیراعظم نوازشریف کی درخواست سماعت کے لیے مقرر کردی گئی ہے۔ذرائع کے مطابق اسلام آباد ہائی کورٹ نے سابق وزیراعظم کی درخواست کو (کل)بروز سوموار 7 جنوری کو سماعت کے لیے مقرر کردیا ہے۔

جس کیلئے چیف جسٹس اطہرمن اللہ نے 2 رکنی بینچ تشکیل دے دیا ہے‘ عدالت عالیہ کا فاضل بینچ چیف جسٹس اطہرمن اللہ اور جسٹس عامر فاروق پر مشتمل ہے۔واضح رہے کہ احتساب عدالت کی جانب سے مسلم لیگ (ن) کے قائد نوازشریف کو العزیزیہ ریفرنس میں 7 سال قید اور جرمانے کی سزا سنائی تھی ‘جس پر نوازشریف کے وکیل خواجہ حارث نے ان کی سزا معطل کرنے کی درخواست اسلام آباد ہائی کورٹ میں دائر کی تھی ‘جس پر عدالت نے اعتراض لگا کر واپس کردی تھی۔عدالت کی جانب سے درخواست پر اعتراضات ہونے کی وجہ سے وکلاء نے درخواست واپس لے لی تھی اور اب نواز شریف کے وکلاء نے درخواست پر رجسٹرار آفس کے اعتراضات دور کرکے العزیزیہ ریفرنس میں سزا معطلی کی درخواست دوبارہ دائر کردی‘ درخواست نواز شریف کے وکیل منور اقبال دگل نے دائر کی۔ درخواست میں استدعا کی گئی کہ اپیل پر فیصلے تک احتساب عدالت کی جانب سے سنائی گئی سزا معطل کی جائے اور نواز شریف کی ضمانت پر رہائی کے احکامات جاری کیے جائیں۔خیا ل رہے کہ قومی احتساب بیورو (نیب) نے بھی فلیگ شپ ریفرنس میں نوازشریف کی بریت کیخلاف درخواست دائر کررکھی ہے جبکہ العزیزیہ ریفرنس کے فیصلے کو بھی چیلنج کیا گیا جس میں نوازشریف کی سزا بڑھانے کی استدعا کی گئی۔