اسلام آباد(مانیٹرنگ  ڈیسک)ن لیگ کے رہنما اور سابق وزیر داخلہ احسن اقبال نے نواز شریف سے ملاقات کے بعد کوٹ لکھپت جیل کے باہر میڈیا سے گفتگو کرتے ہوئے انکشاف کیا ہے کہ پی ٹی آئی حکومت کے ایک سو پچیس دنوں میں 5لاکھ افراد بیروزگار ہو چکے ہیں، ملک کو دس سالوں میں اتنا نقصان نہیں پہنچا جتنا ان ایک سو پچیس دنوں میں پہنچ چکا ہے۔ انہوں نے عمران خان کو

پاکستانی تاریخ کا جھوٹا ترین لیڈر قرار دیتے ہوئے کہا کہ جن لوگوں نے انہیں ووٹ دیا وہ بھی رو رہے ہیں۔ عمران خان نے اقتدار کیلئے قوم سے جھوٹ بولا کہ وہ پہلے 100روز میں پٹرول، بجلی سستی اور ٹیکس کم کرینگے جبکہ اشیائے ضروریہ کی چیزوں میں بھی کمی لاتے ہوئے مہنگائی کم کرینگے۔ اب مہنگائی دس سال کی بلند ترین سطح پر ہے۔ ایک شخص نے صرف اقتدار کیلئے جھوٹ بولا اور بہتان لگائے۔ انہوں نے نواز شریف پر تین سو ارب کا الزام لگایا اور اب تین ریفرنسز کا فیصلہ آچکا ہے ان میں ایک ارب روپیہ بھی سامنے نہیں آسکا۔ کدھر ہے وہ دو سو ارب ڈالر جو عمران خان نے اقتدار کے اگلے روز ہی بیرون ملک سے واپس لانے تھے ۔ جن لوگوں نے انہیں ووٹ دیا وہ بھی رو رہے ہیں۔یہ اس قوم کا المیہ ہے کہ انہوں نے کہا کہ جس لیڈر نے پاکستان کو بچایاوقار دیا وہ کوٹ لکھپت جیل میں، جس نے سازش کی ، وہ وزیراعظم ہائوس میںہے۔ ن لیگ نے اپنے دور میں 12ہزار میگاواٹ بجلی پیدا کی ۔ انہوں نے کہا کہ عمران خان سلیکٹڈ وزیراعظم ہیں مصنوعی قیادت زیادہ دیر نہیں چل سکتی ، مصنوعی بندوبست جلد ختم ہو جائیگا، ن لیگ جلد ملک کی باگ ڈور سنبھالے گی۔ ان کے پاس پانچ سے چھ ارکان کی مانگے تانگے کی اکثریت ہے اور کھیل کسی بھی وقت ان کے ہاتھ سے نکل سکت اہے۔ انہوں نے کہا کہ حکومت کو مناسب وقت دینا چاہتے ہیں تاکہ یہ لوگ اپنی ناکامیوں کا ملبہ ہم پر نہ ڈال سکیں۔ ہم انہیں مکمل طو رپر ایکسپوز کرنا چاہتے ہیں۔ ن لیگ کے اندرونی معاملات کے حوالے سے بات کرتے ہوئے احسن اقبال کا کہنا تھا کہ پارٹی میں قیادت کا نہ تو فقدان ہے اور نہ ہی کوئی بحران، پارٹی معاملات کیلئے مشاورتی بورڈ ہے جبکہ پارٹی کا صدر بھی موجود ہے۔