اسلام آباد(آن لائن) وفاقی و زیر آبی وسائل فیصل واوڈا نے دعویٰ کیا ہے کہ نواز شریف نے حکومت کو2ارب ڈالر ادا کرنے کی پلی بارگین کی پیشکش کی ہے اور کہا ہے کہ میری جان چھوڑ دیں سیاست سے توبہ کر لوں گا لیکن تحریک انصاف کی حکومت ان سے کوئی ڈیل نہیں کرے گی۔ بدھ کے روز نجی ٹی وی سے گفتگو کرتے ہوئے فیصل واوڈا نے دعویٰ کیا ہے کہ سابق وزیراعظم نواز شریف نے حکومت کو دو ارب ڈالر پلی بارگین کی پیشکش کی ہے اور کہا ہے کہ میری جان بخش دی جائے میں ہمیشہ کیلئے سیاست سے

کنارہ کشی اختیار کر لوں گا لیکن ان کے بیٹوں نے رقم ادائیگی کی حامی بھرنے سے انکار کر دیا۔ نواز شریف کے صاحبزادے ان سے لاتعلق ہو چکے ہیں جو چاہیے میرے اس دعوے کی تصدیق کروالے۔ فیصل واوڈا نے کہا کہ جس سیاست میں پیسے کیلئے بیٹی باپ کو پھنسا دے ایسی ریاست کا کوئی فائدہ نہیں۔ انہوں نے کہا کہ فی الحال نواز شریف کی پیشکش کی مزید تفصیل نہیں بتا سکتا وقت گزرنے کے ساتھ تمام تفصیل سامنے آجائے گی صرف اتنا بتا سکتا ہوں کہ نواز شریف نے 2ارب ڈالر کی آفر براہ راست حکومت کوکی ہے۔