اسلام آباد(مانیٹرنگ ڈیسک) کراچی ائیرپورٹ پر مسافروں کی شکایات سامنے آنے پر وفاقی وزیر خزانہ اسد عمر غصے میں آ گئے اور پی آئی اے کے چیئرمین کو ڈانٹ پلا دی۔تفصیلات کے مطابق سوشل میڈیا پر ایک ویڈیو تیزی کیساتھ وائرل ہو رہی ہے جس میں دیکھا جا سکتا ہے کہ ائیرپورٹ پر موجود چند مسافروں نے جب فلائٹ آپریشن سے متعلق شکایت کی تو اسد عمر نے ٹیلی فون پر کسی سینئر افسر سے گفتگو شروع کر دی تاہم ویڈیو پوسٹ کرنے والے کا کہنا ہے کہ دوسری جانب موجود شخص کوئی اور نہیں بلکہ پی آئی اے کے چیئرمین تھے۔
اسد عمر نے ائیرپورٹ پر موجود عملے کی تعلیم سے متعلق سوال اٹھاتے ہوئے انہیں فوراً ذمہ دار اور سینئر افسر کے ذریعے مسافروں کی شکایت دور کرنے کی ہدایت کی۔ انہوں نے فون پر گفتگو کرتے ہوئے یہ بھی کہا کہ میں نے گزشتہ مہینے ہی 70 ارب جاری کئے ہیں لیکن ایسا محسوس ہو رہا ہے کہ میں نے یہ رقم کھوہ کھاتے میں ڈال دی ۔اسد عمر نے یہ بات کرنے کیساتھ ہی کسی ذمہ دار شخص کے ذریعے مسافروں کا مسئلہ حل کرنے کی ہدایت دے کر فون بند کر دیا جس پر مسافروں نے بھی ان کا شکریہ ادا کیا۔
