نیویارک (این این آئی)خلائی میدان ہو یا گاڑیوں کی صنعت میں انقلاب ہو یا ٹریفک جام کا مسئلہ حل کرنے کا عزم، ایلون مسک کا نام کسی کے لیے انجان نہیں مگر وہ ایک بولی وڈ فلم کے مداح ہوسکتے ہیں، یہ کس نے سوچا ہوگا؟کم از کم ان کی ایک ٹوئیٹ سے تو کچھ ایسا ہی عندیہ ملتا ہے۔

ٹیسلا اور اسپیس ایکس کے بانی ایلون مسک نے گزشتہ روز اپنی ایک ٹوئیٹ میں بولی وڈ فلم باجی راؤمستانی کا ایک منظر ٹوئیٹ کیا۔تصویر میں تو کوئی خاص بات نہیں مگر ٹوئیٹ کا کیپشن ضرور خاص تھا جس میں فلم کے نام کے آگے پیچھے دل بنا ہوا تھا جبکہ ایک یوٹیوب لنک بھی موجود تھا جو کہ گانے ’’دیوانی مستانی‘‘ کا تھا۔اس فلم میں رنویر سنگھ، دپیکا پڈوکون اور پریانکا چوپڑا نے مرکزی کردار ادا کیے تھے۔یہ تو ایلون مسک نے نہیں لکھا کہ انہیں فلم پسند آئی یا گانا مگر 2015 کی یہ فلم تین سال بعد اسپیس ایکس کے بانی کی توجہ کا مرکز بنی ہے۔اس ٹوئیٹ پر لوگوں کا کافی ردعمل سامنے آیا جسے ہزاروں بار ری ٹوئیٹ کیا گیا جبکہ اسٹریمنگ پلیٹ فارم ایروس ناؤنے بھی اس موقع کا فائدہ اٹھاتے ہوئے بتایا کہ یہ فلم ڈیجیٹل ویونگ کے لیے دستیاب ہے۔ویسے تو ایک ہندی یا اردو نہ جاننے والے شخص کے لیے کسی بولی وڈ فلم کو پسند کرنا کچھ عجیب لگتا ہے مگر ایلون مسک کے اکثر منصوبوں جیسے ہائپر لوگ یا مریخ تک انسان بردار مشن بھیجنے سے زیادہ عجیب نہیں۔