واشنگٹن(این این آئی)سلامتی کونسل میں امریکی مندوب نے یمن میں حوثیوں کو ایران کی طرف سے فراہم کی جانے والی فوجی امداد کی شدید مذمت کرتے ہوئے کہاہے کہ ایران حوثی باغیوں کو اسلحہ فراہم کرکے امن مساعی کو تباہ اور یمن کی جنگ کو مزید بھڑکا رہا ہے۔
یمن کے حوالے سے منعقدہ سلامتی کونسل کے اجلاس کے دوران خطاب کرتے ہوئے امریکی مندوب نے کہا کہ ایران باقاعدگی کے ساتھ حوثی باغیوں کو اسلحہ فراہم کر رہا ہے جس کے نتیجے میں یمن میں امن کی کوششوں کو نقصان پہنچ رہا ہے۔انہوں نے کہا کہ سلامتی کونسل کو چاہیے کہ وہ یمن میں مداخلت کرنے پرایران کا محاسبہ کرے۔ امریکی ایلچی نے یمن میں امن وامان کے قیام اور عالمی مبصرین کی تعیناتی کی حمایت کے حوالے سے برطانیہ کی طرف سے پیش کی گئی قرارداد میں ایران کی مذمت نہ کرنے پرافسوس کا اظہار کیا۔اس موقع پر برطانوی مندوبہ کارین بیرس نے کہا کہ سلامتی کونسل میں پیش کی جانے والی قرارداد سویڈن میں ہونے والے مذاکرات کو کامیاب بنانے کی کوشش ہے۔ ہم یمن میں امن وامان کی بحالی کیلئے ہرممکن کوشش کریں گے۔انہوں نے کہا کہ ہمیں اس وقت تمام توجہ اسٹاک ہوم میں یمنی متحارب فریقین کے درمیان طے پائے سمجھوتے کو کامیاب بنانے پرمرکوز ہونی چاہیے۔ انہوں نے کہا کہ یمن میں امن وامان کی صورت حال بدستورمشوش ہے اور ملک کو قحط اور فاقہ کشی سے بچانے کیلئے بہت کچھ کرنا ہو گا۔
