گوانگ زو (این این آئی) چین کی ایک یونیورسٹی میں بالی ووڈ اداکار عامر خان کی آمد کا سن کر ہزاروں طلبا پہنچ گئے جس پر یونیورسٹی انتظامیہ نے پروگرام منسوخ کردیا۔میڈیا رپورٹ کے مطابق فلم ’ ٹھگز آف ہندوستان‘ کی بھارت میں ناکامی کے بعد عامر خان ان دنوں فلم کی تشہیر کیلئے چین میں موجود ہیں تاہم اداکار کو چین کی ایک یونیورسٹی میں فلم کی تشہیر کی اجازت نہیں ملی۔
اور عین موقع پر تقریب منسوخ ہوگئی۔اطلاعات کے مطابق چائنیز یونیورسٹی میں منعقدہ تقریب عامر خان کی چائنیز طالب علموں سے صرف ملاقات پر مبنی تھی لیکن طالب علموں کو سوشل میڈیا کے ذریعے پتا چلا کہ یہ تقریب محض ایک ملاقات نہیں بلکہ فلم ’ٹھگز آف ہندوستان‘ کی تشہیر کے حوالے سے ہے جس میں فلم کے دیگر کردار بھی شریک ہو رہے ہیں۔ یونیورسٹی انتظامیہ کو تقریب شروع ہونے سے ایک گھنٹہ قبل ہی فلم کی تشہیر کے حوالے سے علم ہوا جس پر انتظامیہ نے یہ تقریب منسوخ کردی۔ کہا جارہا ہے کہ یونیورسٹی انتظامیہ نے یہ تقریب نجی کمپنی کی جانب سے فلم کی تشہیر سے متعلق آگاہ نہ کرنے کی وجہ سے منسوخ کی۔دوسری جانب عامر خان کے ترجمان نے تردید کرتے ہوئے کہا کہ تقریب کی منسوخی کی وجہ درحقیقت تقریب کی جگہ ہے جو صرف 400 افراد کیلئے ہے تاہم فلم ’ٹھگز آف ہندوستان‘ کے دیگر کرداروں کی آمد کی خبر سوشل میڈیا پر عام ہونے کی وجہ سے وہاں تین ہزار سے زائد افراد پہنچ گئے جس کی وجہ سے یونیورسٹی انتظامیہ کو یہ تقریب منسوخ کرنا پڑی۔
