ممبئی (نیوزڈیسک) بھارتی بلے باز ویراٹ کوہلی کو آئی سی سی ضوابط کی خلاف ورزی کے الزام سے کلیئر قرار دیدیا گیا ہے۔کوہلی اتوار کے روز کھیلے گئے دہلی ڈیئر ڈیولز کیخلاف میچ میں ڈریسنگ ایریا سے ملحقہ وی آئی پی انکلوڑر میں موجود اپنی گرل فرینڈ انوشکا شرما سے بات چیت کرتے ہوئے پائے گئے تھے۔اس وقت میچ بارش کے باعث رکا ہوا تھا۔آئی سی سی قوانین کے تحت کسی کھلاڑی یا آفیشل کو دوران میچ اس امر کی اجازت نہیں کہ وہ غیر متعلقہ افراد سے بات کرے۔ ویرات کوہلی کیخلاف آئی سی سی کے محکمہ اینٹی کرپشن نے ایکشن لیا تھا جو کہ ڈریسنگ ایریا کی نگرانی پر معمور ہے۔ آئی پی ایل میں کرپشن کی خبریں سامنے آنے کے بعد بی سی سی کی درخواست پر اب آئی سی سی آفیشل اس کی نگرانی کرتے ہیں۔ مذکورہ واقعے پر کوہلی کو طلب کیا گیا تھا اور ان سے پوچھ گچھ کے بعد اسے معمولی واقعہ قرار دیتے ہوئے معاملہ رفع دفع کرنے پر اتفاق ہوا۔