لاہور( این این آئی) پاکستان کارپٹ مینو فیکچررز اینڈ ایکسپورٹرز ایسوسی ایشن کے زیر اہتمام تین روزہ عالمی نمائش بدھ سے لاہور کے مقامی ہوٹل میں شروع ہو گی جس میں شرکت کیلئے غیر ملکی خریداروں اورمندوبین کی پاکستان آمد کا سلسلہ آج (پیر ) سے شروع ہو جائے گا ،ٹریڈ ڈویلپمنٹ اتھارٹی پاکستان کے ڈائریکٹر جنرل میاں ریاض احمد نمائش کا افتتاح کریں گےجبکہ وزیر اعظم کے مشیر

برائے تجارت و ٹیکسٹائل عبد الرزاق داؤد 18اکتوبر کو ایوارڈ تقریب کے مہمان خصوصی ہوں گے۔ ان خیالات کااظہارایسوسی ایشن کے سینئر وائس چیئرمین اعجاز الرحمن نے نمائش کی حتمی تیاریوں کا جائزہ لینے کیلئے منعقدہ اجلاس میں کیا ۔ اس موقع پر گروپ لیڈر عبد الطیف ملک ، کارپٹ انسٹی ٹیوٹ کے چیئرمین سعید خان ، کوار ڈی نیٹر ٹڈیپ ریاض احمد ، اکبر ملک سمیت دیگر بھی شریک ہوئے ۔ اجلاس میں اس عزم کااظہار کیا گیا کہ امریکہ ، برطانیہ،جرمنی ، آسٹریلیا سمیت دیگر ممالک سے آنے والے غیر ملکیوں کی بھرپور مہمان نوازی کی جائے گی ۔اس موقع پر تین رکنی کمیٹی بھی تشکیل دی گئی جونمائش میں شرکت کرنے والے غیر ملکی خریداروں اور مندوبین سے مستقبل میں مضبوط روابط کو یقینی بنانے کیلئے اقدامات کو یقینی بنائیں گی۔ اعجاز الرحمن نے کہا کہ نمائش میں 70مقامی مینو فیکچررز کی جانب سے کارپٹ مصنوعات کے 70سٹالز لگائے جائیں گے ۔ نمائش میں غیر ملکیوں کے علاوہ پاکستانی شہریوں کی کثیر تعداد بھی شرکت کرے گی ۔ انہوں نے کہا کہ تین روزہ عالمی نمائش شدید مشکلات سے دوچار کارپٹ انڈسٹری کیلئے ہوا کا تازہ جھونکا اور اس کیلئے تقویت کا باعث بنے گی جس سے روزگار کے نئے مواقع پیدا ہوں گے۔ اس موقع پر ایسوسی ایشن کے سینئر ممبر اور کوار ڈی نیٹر ریاض احمد نے ٹریڈ ڈویلپمنٹ اتھارٹی پاکستان اور دیگر اداروں کے ذمہ داران سے ہونے والے رابطوں بارے بھی بریفنگ دی ۔