لاہور(شوبز ڈیسک) اداکار احسن خان نے کہا ہے کہ سپیشل بچے ہماری خصوصی توجہ ،محبت اور خلوص سے بڑے خوش ہوتے ہیں ا ور خاص طور پر شوبز، سپورٹس سے وابستہ نامور شخصیات جب ان سپیشل بچوں سے ملنے جاتی ہیں تو وہ سپیشل بچے انکو اپنے درمیان پاکر خوشی سے پھولے نہیں سماتے ۔ا نہوں نے ’’این این آئی‘‘ سے خصوصی گفتگو کرتے ہوئے بتایا کہ میں دوروز قبل کراچی میں دارا لسکون میں سپیشل بچوں سے ملنے گیا اور ان بچوں نے مجھے دیکھ کر بڑی خوشی بھرے جذبات کا اظہار کیا۔
اور میں نے بھی اپنی دیگر مصروفیا ت ترک کر ان بچوں کے ساتھ گپ شپ لگائی ۔ انہوں نے کہا کہ سپیشل بچے ہماری خصوصی توجہ اور محبت کے طلب گار ہوتے ہیں ان کے ساتھ وقت گزار کر سکون میسر آتا ہے اور میری تمام سلیبرٹیز سے اپیل ہے کہ وہ معاشرے میں رہنے والے ان سپیشل بچوں کے اداروں میں جاکر ان سے ملا کریں ۔احسن خان نے کہا کہ یہ بھی ہمارے بچوں کی طرح ہی ہیں اوران کو عام بچوں سے زیادہ ہماری محبت اور توجہ کی ضرورت ہے اوریہ کام ہم سب مل کر کرسکتے ہیں ۔
