ممبئی(شوبز ڈیسک)بولی وڈ اداکار آیوشمن کھرانہ کی فلم ’اندھا دھن‘ بھارتی باکس آفس پر شاندار کمائی کرنے میں مصروف ہے۔یہ فلم اس بات کی مثال ہے کہ اب باکس آفس پر خان اور کپور کے بغیر بھی فلمیں اچھا بزنس کرسکتی ہیں اور ناظرین کے لیے سب سے اہم کہانی ہی ہوتی ہے۔رواں برس اداکار راج کمار راؤ کی فلم ’ستری‘ باکس آفس پر شاندار کمائی کرنے میں مصروف رہی اور اب آیوشمن کھرانہ کی فلم ’اندھا دھن‘ مداحوں کو خوب بھا رہی ہے۔

اس فلم میں آیوشمن کھرانہ کے ساتھ اداکارہ ردھیکا آپٹے اور تبو نے اہم کردار ادا کیا۔فلم رواں ماہ 5 اکتوبر کو ریلیز ہوئی جس نے پہلے روز 3 کروڑ روپے کے قریب کمائی کی، جس کے بعد اس کے بزنس میں ہر گزرتے دن کے ساتھ اضافہ ہوا۔ریلیز کے دوسرے روز 5 کروڑ جبکہ تیسرے روز 7 کروڑ روپے کمائے۔فلم میں آیوش مان کھرانہ نے ایک نابینائی شخص کا کردار ادا کیا، جو پیانو بجانے کا ماہر ہے۔’’اندھا دھن‘‘ کو تجزیہ کاروں نے بھی رواں سال کی شاندار فلم قرار دیا ہے۔