اسلام آباد(این این آئی)وزیراعظم عمران خان نے کہا ہے کہ پاک چین دوستی مضبوط بنیادوں پر کھڑی ہے ٗ چین ہرمشکل گھڑی میں پاکستان کے ساتھ کھڑا ہوا ہے۔ پیر کو وزیراعظم عمران خان کی زیرصدارت وزیراعظم آفس میں اعلی سطح کا اجلاس ہوا، اجلاس میں وزیرخزانہ اسدعمر، وزیرخارجہ شاہ محمودقریشی ، وفاقی وزیر اطلاعات و نشریات چوہدری فواد حسین ، وزیرمنصوبہ بندی خسروبختیار، وزیر توانائی عمر ایوب خان،
وزیراعظم کے مشیر عبد الرزاق داؤد اور ڈاکٹر عشرت حسین کے علاوہ سیکرٹری خارجہ ، سیکرٹری منصوبہ بندی و دیگر سینئر افسران نے شرکت کی۔ اجلاس سے خطاب کرتے ہوئے وزیراعظم نے کہا کہ پاک چین اسٹریٹجک پارٹنر شپ کا استحکام پاکستان کی خارجہ پالیسی کا بنیادی ستون ہے ۔ انہوں نے کہا کہ سی پیک منصوبوں کی جلد تکمیل سے پاک چین اقتصادی تعلقات کا ادراک کرنے میں مدد ملے گی اور اس سے نہ صرف دونوں ممالک بلکہ پورا خطہ مستفید ہو گا۔ وزیراعظم نے کہا کہ سی پیک چینی تجربے سے بالخصوص سماجی شعبے ، زراعت اور دیگر شعبوں میں استفادے کا شاندار موقع ہے ۔ انہوں نے کہا کہ ملک کی زرعی پیداوار جو ملکی معیشت کی ریڑھ کی ہڈی سمجھی جاتی ہے میں چینی مہارت سے استفادہ کر کے اور جدید ٹیکنالوجی کو بروے کار لا کر کئی گنا اضافہ کیا جا سکتا ہے ۔ وزیراعظم عمران خان نے ملک کے مختلف علاقوں میں خصوصی اقتصادی زونز کے جلد قیام پر توجہ مرکوز کرنے کی ضرورت پر زور دیا جن سے مقامی صنعت کو فروغ پانے کا موقع ملے گا اور نوجوانوں کیلئے روزگار کے وسیع مواقع پیدا ہونگے۔ وزیراعظم نے کہا کہ صدر ژی جن پنگ کی طرف سے بیلٹ اینڈ روڈ منصوبے کے تحت چین پاکستان اقتصادی راہداری سے دوسرے ممالک کو بھی سی پیک منصوبوں میں سرمایہ کاری اور متعدد شعبوں میں فائدہ اٹھانے کے مواقع میسر آئے ہیں ۔ اجلاس کے دوران وزیراعظم کے آئندہ دورہ چین اور سی پیک منصوبوں سے متعلق تبادلہ خیال کیا گیا۔
