اسلام آباد (مانیٹرنگ ڈیسک) امریکی وزیر خارجہ مائیک پومپیو کی پاکستان آمد، اعلیٰ پاکستانی حکام میں سے کسی نے استقبال نہ کیا، ائیرپورٹ پر دفتر خارجہ کے ایڈیشنل سیکرٹری شجاع عالم رسیو کرنے گئے۔ تفصیلات کے مطابق امریکی وزیر خارجہ مائیک پومپیو کو پاکستان کو دھمکیاں دینا مہنگا پڑ گیا اور پاکستان نے بھی امریکی وزیر خارجہ کے بیان کے بعد اپنے روئیے میں سرد مہری

لاتے ہوئے امریکی وزیر خارجہ کو واضح پیغام دیدیا ہے کہ پاکستان امریکی دھمکیوں سے مرعوب ہونے والا نہیں۔ پاکستان کی جانب سے امریکی وزیر خارجہ کی پاکستان آمد کے موقع پر کسی پاکستانی اعلیٰ حکام نے ان کا استقبال نہیں کیا اور ائیرپورٹ پر امریکی وزیر خارجہ کو رسیو کرنے کیلئے دفتر خارجہ کے ایڈیشنل سیکرٹری شجاع عالم موجود تھے۔ شجاع عالم کی جانب سے استقبال کے بعد مائیک پومپیو دفتر خارجہ پہنچے جہاں وزیر خارجہ شاہ محمود قریشی نے ان کا استقبال کیا۔ جہاں پاک امریکہ وفود کی سطح پر مذاکرات کئے گئے اور یہ مذاکرات 40منٹ پر محیط تھے جس کے بعد امریکی وزیر خارجہ اور ان کا وفد واپس روانہ ہو گیا ہے۔ پاکستان پہنچنے پر وزارت خارجہ سمیت اعلی حکام میں سے کسی نے امریکی وزارت خارجہ کا استقبال نہیں کیا۔جب کہ اس سے پہلے جب بھی امریکہ کا آفیشل وفد پاکستان آیا تو ان کا پاکستان کے اعلی سطح کے حکام کی طرف سے استقبال کیا جاتا تھا۔تاہم اس بار امریکی وزیر خارجہ کی پاکستان آمد پر ان کا استقبال دفتر خارجہ کے ایڈیشنل سیکرٹری نے کیا۔جس سے یہ سوال پیدا ہوتا ہے کہ کیا پاکستان اور امریکہ کے مابین کشیدہ حالات پر پاکستان نے امریکہ کو واضح پیغام دے دیا ہے۔واضح رہے کہ امریکی وزیر خارجہ نے امریکہ سے پاکستان کیلئے روانہ ہوتے ہوئے بیان دیا تھا کہ پاکستان کوجنرل ملر اور امریکی فوج کی جانب سے پیغام دیدیا گیا ہے کہ اگر اس نے تعاون نہ کیا تو کیا ہو گا۔