لوئر دیر (آئی این پی ) اسکول کی طالبہ سے زیادتی کے الزام میں بااثر ملزم کے خلاف مقدمہ درج کرلیا گیا تاہم تاحال گرفتاری عمل میں نہ لائی جا سکی ، ملزم نے متاثرہ خاندان کو سنگین نتائج کی دھمکیاں دینا شروع کر دیں ۔ تفصیلات کے مطابق لوئر دیر کے علاقے ماندیش بلامبٹ میں 14 سالہ طالبہ سے زیادتی کا سنگین واقعہ پیش آیا۔ 25 سالہ بااثر ملزم نے اسلحہ کے زور پر طالبہ کو قبرستان میں لے جا کر زیادتی کی۔ تاہم جب متاثرہ لڑکی کے اہل خانہ مقدمہ درج کرانے تھانے پہنچے تو خیبرپختون خوا پولیس

نے بااثر ملزم کے دبا میں آکر مقدمہ درج کرنے سے انکار کردیا۔علاقہ عمائدین متاثرہ خاندان کی مدد کے لیے تھانہ خال پہنچے اور پولیس پر دبا ڈالا جس پر واقعے کے 3 دن بعد مقدمہ درج کیا گیا۔ اس کے باوجود پولیس نے تاحال ملزم کو گرفتار نہیں کیا ہے۔ متاثرہ بچی مقامی گرلز مڈل اسکول میں ساتویں جماعت کی طالبہ ہے اور اس کے اہل خانہ نے بتایا ہے کہ ملزم سنگین نتائج کی دھمکیاں بھی دے رہا ہے۔ مقامی عمائدین کے مطابق متاثرہ گھرانہ غریب ہے ، اس لیے اس کا مقدمہ درج کرنے میں پولیس ٹال مٹول کرتی رہی۔