لاہور(این این آئی) حکومت پنجاب کے ترجمان نے میڈیا پر نشر ہونے والی خبر کی تردید کرتے ہوئے کہاہے کہ وزیراعلیٰ پنجاب کے تحصیل ہیڈکوارٹر ہسپتال میا ں چنوں کے دورے کے دوران بچی کے جاں بحق ہونے کا واقعہ پیش نہیں آیا۔ ترجمان نے بتایا کہ دورے کے دوران وزیراعلی سے ایک روز قبل مذکورہ ہسپتال میں جاں بحق ہونے والی بچی کے
لواحقین نے ملاقات کر کے واقعہ کی تفصیل بیان کی ہے۔ وزیر اعلی نے لواحقین کودلاسہ دیا اور حقائق جاننے کیلئے کمیٹی تشکیل دینے کی ہدایت کرتے ہوئے کہاکہ کمیٹی 48 گھنٹے کے اندر بچی کے جاں بحق ہونے کے واقعہ کی رپورٹ پیش کرے گی۔ترجمان نے مزید کہاکہ میڈیا میں اس کے بارے میں نشر ہونے والی خبر حقائق کے برعکس ہے ۔
