اسلام آباد(مانیٹرنگ ڈیسک)حکومت کی ہر چیز کے فیصلے گوگل سے ہو رہے ہیں، ہرمعاملے کا حل گوگل دے تو حکومت کس مرض کی دوا ہے، امید ہے پیپلزپارٹی ہماری درخواست پر غور کرے گی،جوں جوں دن گزر رہے ہیں ایسا معلوم ہو رہا ہے کہ انڈر 11کی ٹیم حکومت کر رہی ہے، احسن اقبال کی میڈیا سے گفتگو۔تفصیلات کے مطابق ن لیگ کے رہنما اور سابق وفاقی وزیر داخلہ احسن اقبال نے اپوزیشن رہنمائوں کے ہمراہ میڈیا سے گفتگو کرتے ہوئے تحریک انصاف کی وفاقی حکومت پر
شدید تنقید کرتے ہوئے وفاقی وزیر اطلاعات فواد چوہدری کے گزشتہ روز عمران خان کے ہیلی کاپٹر کے اخراجات سے متعلق تفصیلات گوگل سے معلوم کرنے کے بیان پر کہا ہے کہ حکومت کی ہر چیز کے فیصلے گوگل سے ہو رہے ہیں، ہرمعاملے کا حل گوگل دے تو حکومت کس مرض کی دوا ہے، جوں جوں دن گزر رہے ہیں ایسا معلوم ہو رہا ہے کہ انڈر 11کی ٹیم حکومت کر رہی ہے۔ صدارتی امیدوار کے معاملے پر احسن اقبال کا کہنا تھا کہ امید ہے پیپلزپارٹی ہماری درخواست پر غور کرے گی۔
