اسلام آباد (مانیٹرنگ ڈیسک) ،ایک نجی ٹی وی چینل کی رپورٹ کے مطابق ڈاکٹر عطا الرحمان اور عبدالرزاق داؤد کو مشیر بنانے پر غور کیا جا رہا ہے اس کے علاوہ تحریک انصاف کے چیئرمین عمران خان نے شعیب سڈل کو بھی بنی گالہ بلا لیا ہے۔ رپورٹ کے مطابق تحریک انصاف نے تبدیلی کا مشن پورا کرنے کی تیاریوں کا آغاز کر دیا ہے، اعلیٰ قیادت کی جانب سے مختلف شعبوں میں اہم عہدوں پر فائز رہنے والی شخصیات کو نئی حکومت میں ذمہ داریاں سونپنے پر غور
جاری ہے۔ واضح رہے کہ پرویز مشرف دور کے چیئرمین ہائر ایجوکیشن کمیشن ڈاکٹر عطا الرحمان اور سابق وزیر تجارت عبدالرزاق داؤد کو تحریک انصاف حکومت میں مشیر بنائے جانے کا امکان ہے، اس کے علاوہ عمران خان نے سابق وفاقی ٹیکس محتسب شعیب سڈل کو بھی بنی گالہ طلب کر لیا ہے، تحریک انصاف کے چیئرمین عمران خان سے معروف صنعتکار عقیل کریم ڈھیڈی نے بھی ملاقات کی اور اس ملاقات میں معیشت کی بحالی کے لیے اہم تجاویز بھی دیں۔
