اسلام آباد (مانیٹرنگ ڈیسک )عمران خا ن نے گزشتہ روزمحمود خان کو وزیراعلیٰ خیبر پختونخوا نامزد کر دیا لیکن انہیں وزیراعلیٰ کیوں بنایا جارہاہے ؟ اس حوالے سے سینئر صحافی سلیم صافی نے انتہائی حیران کن دعویٰ کر دیا۔سلیم صافی کا کہناتھا کہ محمود خان ناکام وزیر ثابت ہوئے ہیں ، جب یہ لوگ اقتدار میں آئے تو انہیں پہلے زراعت کی وزارت دی گئی اور 2013 کے آخر میں انہیں داخلہ کی منسٹری دی گئی۔

لیکن انہوں نے دو مہینے بعد ہی یہ کہہ کر معذرت کر لی کہ اس میں خطرہ بہت زیادہ ہے اس لیے نہیں کرسکتا اور انہیں 15 جون کو وہاں سے بھی ہٹا دیا گیا تاہم آخر میں ان کے پاس صرف سپورٹس کی منسٹری تھی ۔سلیم صافی کا کہناتھا کہ محمود خان کا تحریک انصاف میں تین بڑی لابیوں میں سے کسی کے ساتھ تعلق نہیں ہے وہ مراد سعید کی لابی کے بندے سمجھے جاتے ہیں تاہم اندر کی خبر یہ ہے کہ انہیں وزیراعلیٰ بنانے کیلئے ارباب شہزاد اور جہانگیر ترین کردار ادا کر رہے ہیں ، ان دونوں کی رائے یہ ہے کہ ہمیں ایک ڈمی وزیراعلیٰ ہی سوٹ کرےگا کیونکہ مضبوط چیف سیکریٹری لگا کر اس کے ذریعے معاملات وفاق سے کنٹرول کرنا چاہتے ہیں جبکہ دوسری جانب ارباب شہزادکی گورنر بننے کی خواہش ہے کیونکہ وہ پہلے چیف سیکریٹری تھے اور اب اپنا چیف سیکریٹری لانا چاہتے ہیں تو انہوں نے عمران خان کے ذہن میں یہ بٹھا دیاہے کہ ہمیں محمود خان جیسا کمزور اور گم نام چیف منسٹر اس لیے سوٹ کرے گا کہ ہم چیف سیکریٹری کے ذریعے مرکز سے عوام کی خواہش کے مطابق اپنی پالیسی نافذ کر سکیں ۔واضح رہے کہ محمود خان سے پہلے وزیر اعلیٰ خیبر پختونخواہ کے عہدے کیلئے پرویز خٹک، اسد قیصر اورعاطف خان کا نام لیا جارہا تھا لیکن ان تینوں کی امیدیں اس وقت دم توڑ گئیں جب محمود خان کو وزیر اعلیٰ خیبر پختونخوا نامزد کردیا گیا۔