اسلام آباد(مانیٹرنگ ڈیسک)پاکستان تحریک انصاف کے مرکزی رہنما جہانگیر ترین نے گھر بیٹھنے کا اعلان کرتے ہوئے کہا ہے کہ عمران خان کو وزیراعظم دیکھنا میرا مشن تھا ان کے وزیراعظم بنتے ہی گھر بیٹھ جائوں گا۔ اتوار کے روز اسلام آباد میں میڈیا سے گفتگو کرتے ہوئے جہانگیر خان ترین نے کہا کہ عمران خان کو وزیراعظم کے عہدے پر دیکھنا میرا مشن تھا جیسے ہی عمران خان وزیراعظم بنیں گے میں سیاست سے کنارہ کشی اختیار کر لوں گا اور گھر بیٹھ جائوں گا ۔ صحافی نے جہانگیر ترین سے

سوال کیا کہ آپ کی نا اہلی کے خلاف اپیل کا فیصلہ آنا بھی باقی ہے اور آپ ابھی سے دلبرداشتہ ہو گئے ہیں تو جہانگیر ترین نے جواب دیا کہ اگر فیصلہ میرے حق میں آیا تو بہتر ورنہ مزید سیاست جاری نہیں رکھوں گا اور گھر بیٹھوں گا کیونکہ اگر قانون مجھے اسمبلی کیلئے اہل نہیں سمجھتا تو گھر بیٹھنا ہی بہتر ہے ۔ انہوں نے کہا کہ پنجاب میں ہمارے ایم پی ایز کی تعداد 131ہو چکی ہے اور تحریک انصاف سب سے بڑی جماعت بن کر حکومت بنانے کے قریب ہے جبکہ مزید آزاد ارکان بھی شامل ہو رہے ہیں۔