کراچی (این این آئی) پیپلزپارٹی سندھ اسمبلی کی 74 نشستوں کے ساتھ صوبے میں تیسری باری لینے اورحکومت سازی کی ہیٹ ٹرک کے لیے تیارہوگئی۔ سندھ اسمبلی کی 130 جنرل نشستوں کے غیرحتمی اور غیر سرکاری نتائج کے مطابق پیپلز پارٹی کو 74نشستوں پر برتری حاصل ہے جس کے بعد پیپلزپارٹی صوبے کی سب سے بڑی جماعت بن کر سامنے آئی ہے

اورسندھ میں واضح اکثریت کے ساتھ حکومت بنانے کی تیاری شروع کردی ہے۔سندھ اسمبلی کے 168 کے ایوان پرمشتمل ہے جس میں 29 نشستیں خواتین جب کہ 9 نشستیں اقلیتوں کے لیے مخصوص ہیں۔سندھ میں حکومت سازی کے لیے 68 نشستیں درکار ہوتی ہیں جبکہ غیر سرکاری نتائج کے مطابق پیپلز پارٹی 74 نشستوں کے ساتھ مضبوط پوزیشن میں ہے اور مسلسل تیسری مرتبہ آئندہ پانچ سال کے لیے صوبے میں حکومت بنانے کی پوزیشن میں ہے۔پارٹی پوزیشن کے مطابق تحریک انصاف نے سندھ اسمبلی کی 18، متحدہ قومی موومنٹ پاکستان 12، گرینڈ ڈیموکریٹک الائنس 11، تحریک لبیک پاکستان نے 2 اورمسلم لیگ ن اور متحدہ مجلس عمل نے ایک ایک نشست پر کامیابی حاصل کی ہے۔کراچی میں سندھ اسمبلی کی ایک نشست پرانتخابات ملتوی کیے جاچکے ہیں جبکہ سندھ اسمبلی کی 9 نشستوں کے نتائج آنا ابھی باقی ہیں دوسری جانب خواتین اور اقلیتی نشستوں پرکامیاب سیاسی جماعتوں کے درمیان انہیں حاصل کامیابی کے تناسب سے تقسیم کیا جائے گا جس کے بعد پیپلز پارٹی ایوان میں مکمل طور پر حکومت بنانے کی پوزیشن میں ہوگی۔حالیہ انتخابات میں سندھ میں پیپلزپارٹی کو2013 والی تمام نشستوں پرکامیابی ملی اورپی پی مخالف اتحاد گرینڈ ڈیموکریٹک الائنس سندھ میں کوئی اپ سیٹ کرنے میں کامیاب نہیں ہوسکا ہے۔