کراچی(نیوز ڈیسک) پاک زمبابوے سیریز میں میچ ریفری کے فرائض سابق ٹیسٹ کرکٹر و سلیکٹر اظہر خان نبھائیں گے۔سری لنکن ٹیم پرحملے کے وقت زخمی ہونے والے احسن رضا کے ساتھ شوزب رضا اوراحمد شہاب کوامپائرنگ کی ذمہ داری سونپنے کا امکان ہے، زمبابوین امپائر رسل ٹفن بھی فرائض انجام دیں گے۔ تفصیلات کے مطابق پاکستان میں انٹرنیشنل کرکٹ کی رواں ماہ واپسی ہو رہی ہے، زمبابوین ٹیم19مئی کو لاہور پہنچے گی، سیریز کیلیے آئی سی سی کی جانب سے امپائرزو ریفری بھیجنے کا امکان نہ ہونے کے برابر ہے، گوکہ اس حوالے سے باضابطہ اعلان تو نہیں ہوا مگر پی سی بی کو اشارے مل چکے ہیں، گذشتہ دنوں زمبابوین وفد کے ساتھ ایک آزادانہ سیکیورٹی ماہر بھی لاہور آئے تھے۔
وہ انٹرنیشنل کونسل کو بھی رپورٹ دیں گے، جس کے بعد 2، 3روز میں موقف سامنے آ جائے گا، زبانی طور پر پاکستان کو آگاہ کیا جا چکا کہ اسے اپنے امپائرز و ریفری کے تقرر کی اجازت ہو گی، پی سی بی نے اس حوالے سے ذہن بنا لیا اور سابق ٹیسٹ کرکٹر و موجودہ سلیکٹر اظہر خان کو ریفری کی ذمہ داری سونپی جائے گی، امپائرنگ کیلیے شوزب رضا، احسن رضا اور احمد شہاب فیورٹ ہیں، زمبابوے سے بھی امپائر رسل ٹفن پاکستان آ رہے ہیں، یاد رہے کہ احسن سری لنکن ٹیم پر حملے کے وقت شدید زخمی ہو گئے تھے۔
دریں اثنا پی سی بی میچز دیکھنے کیلیے آئی سی سی کے اعلیٰ حکام این سری نواسن، ڈیو رچرڈسن اور تمام ٹیسٹ اقوام کے بورڈ سربراہان کو دعوت نامے ارسال کر دیے، ذرائع کے مطابق تاحال کسی نے مثبت جواب نہیں دیا مگر بورڈ کو امید ہے کہ چند افراد ضرور لاہور آئیں گے، یاد رہے کہ 22 سے 31 مئی تک شیڈول سیریز کے تمام میچز قذافی اسٹیڈیم میں رکھے گئے ہیں، پہلے2ٹوئنٹی 20 اور اس کے بعد3 ون ڈے انٹرنیشنل کھیلے جائیں گے۔