راولپنڈی (نیوز ڈیسک) وفاقی وزیر منصوبہ بندی و ترقی احسن اقبال کا کہنا ہے کہ بہترین حکومتی اقدامات سے دنیا یہ تسلیم کرنے پر مجبور ہے کہ پاکستان دہشت گردوں کی جنت نہیں۔ آئندہ دس برسوں میں پاکستان کو دنیا کی پچیس بڑی معیشتوں میں شامل کرانے کیلئے کوشاں ہیں۔ کہتے ہیں سیاسی و عسکری قیادت میں مکمل ہم آہنگی ہے ، حکومت نے الطاف حسین کے بیان کا نوٹس لیا ہے۔ وفاقی وزیر ترقی و منصوبہ بندی احسن اقبال نے راولپنڈی میڈیکل کالج کے گیارہویں کانووکیشن میں بطور مہمان خصوصی شرکت کی۔ تقریب میں مجموعی طور پر تین سو نوے طلبہ کو ڈگریاں اور نمایاں کارکردگی کے حامل دس طلبہ کو طلائی تمغے دیئے گئے۔ اس موقع پر خطاب کرتے ہوئے وفاقی وزیر ترقی و منصوبہ بندی احسن اقبال کا کہنا تھا کہ آج فارغ التحصیل ہونیوالے ڈاکٹرز معاشرے کی بہتری کیلئے کردار کریں۔ تقریب کے بعد میڈیا سے گفتگو کرتے ہوئے احسن اقبال نے کہا کہ عسکری اور سیاسی قیادت میں مکمل ہم آہنگی ہے ، حکومت نے الطاف حسین کے فوج اور سیکورٹی اداروں سے متعلق بیان کا نوٹس لیا ہے۔ انہوں نے کہا کہ چین کے صدر کے حالیہ دورہ پاکستان اور اربوں روپے کی چینی سرمایہ کاری کے بعد ملک میں حقیقی تبدیلی آگئی ہے ، موجودہ حکومت کے بہترین اقدامات کے باعث آج دنیا یہ ماننے پر مجبور ہوگئی ہے کہ پاکستان دہشت گردوں کی جنت نہیں۔ حکومت کوشش کر رہی ہے کہ دو ہزار پچیس تک پاکستان دنیا کی پچیس بڑی معیشتوں میں شامل ہوجائے۔ حکومت تمام چینلجز کو شکست دے گی ، ترقی کے لیے محنت میں کوئی کمی نہیں ہونی چاہیئے۔ احسن اقبال نے کہا کہ جوڈیشل کمیشن کی سماعت سپریم کورٹ کے سینئر ججز کر رہے ہیں۔ چیئرمین تحریک انصاف دھاندلی سے متعلق کوئی ثبوت پیش نہیں کرسکے۔