اسلام آباد(مانیٹرنگ ڈیسک)یوم پاکستان پریڈ میں متحدہ عرب امارات کا فوجی دستہ بھی حصہ لے گا، پاکستان کے دفاعی اتاشی ایئر کموڈور محمد اختر کے مطابق یہ پہلا موقع ہوگا جب متحدہ عرب امارات کا فوجی دستہ ، پاکستان کی مسلح افواج کے ساتھ78ویں یوم پاکستان کے حوالے سے اسلام آباد میں منعقدہ سرکاری تقریب میں شرکت کرے گا۔ایئر کموڈور محمد اختر کا کہنا تھا کہ متحدہ عرب امارات کی افواج کی شمولیت دونوں ممالک
کے درمیان تاریخی تعلقات کو مزید استحکام بخشیں گے۔ان کا کہنا تھا کہ متحدہ عرب امارات کی قیادت نے عالمی برادری کو واضح پیغام دیا ہے کہ وہ پاکستان کے ساتھ ہیں۔یاد رہے کہ گزشتہ برس بھی چین کی پیپلز لبریشن آرمی، سعودیہ کا خصوصی فوجی دستہ اور ترکی کے ینی چری ملٹری بینڈ نے بھی یوم پاکستان پریڈ میں شرکت کی تھی۔ یوم پاکستان پریڈ 7 سال کے وقفے کے بعد 2015میں دوبارہ شروع کی گئی تھی۔
