لاہور(نیوزڈیسک) وفاقی وزیر ریلویز خواجہ سعد رفیق نے سپریم کورٹ میں پیش ہوکر پیراگون ہاؤسنگ سوسائٹی کی ملکیت کے الزام کو مسترد کردیاجس پر عدالت نے بیان حلفی طلب کرلیا۔سپریم کورٹ لاہور رجسٹری میں چیف جسٹس پاکستان کی سربراہی میں ایل ڈی اے سٹی سے متعلق از خود نوٹس کی سماعت ہوئی۔

عدالت کے طلب کرنے پر وفاقی وزیر ریلویز خواجہ سعد رفیق عدالت میں پیش ہوئے ۔ چیف جسٹس نے مکالمہ کرتے ہوئے کہا کہ سعد صاحب ہن دسو جو کچھ اخبارات وچ کہندے ہو۔ سعد رفیق نے عدالت کو بتایا کہ میرا پیراگون سٹی سے کوئی تعلق نہیں، پیراگون سٹی شیئرہولڈر ان کے ووٹرز اور سپورٹرز ہیں۔اس پر چیف جسٹس نے ریمارکس دیئے کہ سارا شہر کہہ رہا ہے کہ پیرا گون آپ کا ہے اور آپ نے کہا کہ کوئی تعلق نہیں، نیب تحقیقات کررہی ہے تو نیب اپنا کام جاری رکھے۔خواجہ سعد نے جواباً کہا کہ یہ الزامات سن سن کر کان پک چکے ہیں ۔ جسٹس ثاقب نثار نے ریمارکس دیئے کہ سیاسی تقریر نہیں سیدھی بات کریں۔وزیر ریلوے نے عدالت کو بتایا کہ ان کا کسی ہاؤسنگ سوسائٹی یا ٹوئن ٹاور سے کوئی تعلق نہیں، ان کے خلاف جو لوگ میڈیا ٹرائل کر رہے ہیں انہیں اچھی طرح جانتے ہیں۔فاضل عدالت نے وزیر ریلویز خواجہ سعد رفیق سے پیرا گون سٹی کی ملکیت سے متعلق بیان حلفی طلب کرتے ہوئے سماعت ملتوی کر دی ۔