لاہور (مانیٹرنگ ڈیسک) وفاقی وزیر ریلوے خواجہ سعد رفیق نے کہا ہے کہ صادق اور امین کے فتوے دینے والوں کی اپنی صداقت اور امانت داری مسلمہ ہونی چاہیے ، بغیر ثبوت کے غیر اخلاقی ریمارکس قبول نہیں ہیں ۔ انہوں نے سماجی رابطے کی ویب سائٹ ٹوئٹر پر جاری بیان میں کہا کہ پرہیز گاری کے لبادوں میں لپٹے بد دیانت ہر جگہ پائے جاتے ہیں ،نشانہ ہمیشہ سیاستدان رہے ہیں ، پاکستان میں جمہوریت ٹوٹی پھوٹی سیاسی جماعتوں ہی کی مرہون منت ہے ، مارشل لاء لگانے اور نظریِ ضرورت
کے تحت فیصلے دینے والوں پر آرٹیکل سکس کیوں نہیں لگا ؟،مارشل لاء لگانے اور انہیں جواز بخشنے والوں کو کو سزا نہیں ملی ؟،تمام وزراء اعظم کو ایک سے الزامات پر بد سلوکی کر کے نکالا گیا ۔ خواجہ سعد رفیق نے کہا کہ سیاسی جماعتوں کی قیادت کا فیصلہ سیاسی جماعتیں ہی کریں گی،مائنس ون فارمولا کی سوچ رکھنے والوں کو قوم نے بار بار مسترد کیا، توہینِ عدالت ،جمہوریت یا پارلیمنٹ کو مشغلہ بنانا کسی طرح درست نہیں ، باہمی محاذ آرائی ریاست کو نقصان پہنچا رہی ہے ۔
