اسلام آباد(اے این این)اردو کا خودکار طریقہ سے املا کی غلطیاں درست کرنے کی صلاحیت کا حامل سافٹ ویئر حرف کار کے نام سے تیار کر لیا گیا ہے جو نہ صرف غلط الفاظ کی نشاندہی کرتا ہے بلکہ ایک ہی کلک سے عبارت میں موجود سینکڑوں غلط الفاظ خود کار طریقے سے درست بھی کر دیتا ہے۔ یہ سافٹ ویئر ممتاز شاعر اور ناول نگار اختر رضا سلیمی اور سافٹ ویئر پروگرامر سعید رضا خان اور ان کی ٹیم نے تیار کیا ہے۔
اختر رضا سلیمی کی طرف سے جاری بیان میں کہا گیا ہے اس سافٹ ویئر سے جہاں اردو میں پروف ریڈنگ کے مسائل حل کرنے میں آسانی ہو گی وہیں اردو کی ایک ہی املا رائج کرنے میں بھی مدد ملے گی۔ اس سافٹ ویئر کی تیاری میں اردو کی تمام اہم جدید و قدیم لغات کے ساتھ ساتھ اردو کے قدیم و جدید سرمائے سے بھی استفادہ کیا گیا ہے جبکہ املا کی درستی کے حوالہ سے ان کا کہنا تھا کہ اس ضمن میں جہاں مقتدرہ قومی زبان کے زیر اہتمام 1985 میں املا اور رموز و اوقاف کے موضوع پر ہونے والے سیمینار کی سفارشات سے استفادہ کیا گیا ہے وہیں 1973-74 میں بھارت میں املا کے حوالہ سے بننے والی کمیٹی کی سفارشات کو بھی مدنظر رکھا گیا ہے۔انہوں نے کہا کہ ہماری خواہش ہے کہ پاکستان کی قومی زبان اردو کی ایک ہی املا رائج ہو۔ اپنی اسی خواہش کو عملی جامعہ پہنانے کیلئے ہم نے یہ سافٹ وئیر تیار کیا ہے جس کا 95 فیصد کام مکمل ہو چکا ہے اور آئندہ ماہ ہم اس کی افتتاحی تقریب منعقد کرنے کا ارادہ رکھتے ہیں۔ سافٹ ویئر پروگرامر سعید رضا خان کا کہنا ہے کہ یہ سافٹ ویئر ڈاٹ نیٹ میں تیار کیا گیا ہے اور اس میں کوئی بھی تھرڈ پارٹی ٹول استعمال نہیں کیا گیا اور یہ صرف ایک ہی پوٹ ایبل فائل پر مشتمل ہے جسے انسٹال کرنے کی ضرورت بھی درپیش نہیں ہوتی۔ انہوں نے کہا کہ اس سافٹ ویئر کا سائز بہت معمولی ہے اور اسے کسی بھی کمپیوٹر میں آسانی سے چلایا جا سکے گا۔ اس وقت اردو دنیا میں بے شمار الفاظ کی ایک سے زائد املا رائج ہے۔
