اسلام آباد (مانیٹرنگ ڈیسک) آئی سی آئی جے جو کہ تحقیقاتی صحافیوں کی بین الاقوامی کنسورشیم ہے آج رات نئے انکشافات جاری کرے گی، تفصیلات کے مطابق آئی سی آئی جے نے پاناما لیکس کے تہلکہ خیز انکشافات کے بعد اب نئے انکشافات کرنے کا اعلان کر دیا ہے۔ سماجی رابطے کی ویب سائٹ ٹوئٹر پر آئی سی آئی جے کی طرف سے پیغام میں کہا گیا ہے کہ وہ آج رات نئے انکشافات جاری کرے گی۔
انہوں نے لوگوں سے سوال کرتے ہوئے پوچھا کہ کیا آپ ہمارے اگلے پراجیکٹ کے لیے تیار ہیں؟۔ اس سے پہلے آئی سی آئی جے پاناما لیکس جاری کرکے تہلکہ مچا چکی ہے، ان لیکس میں آف شور کمپنیوں کے حوالے سے کام کرنے والی پاناما کی مشہور لاء فرم موزیک فونسیکا کی خفیہ دستاویزات منظر عام پر لائیگئی تھیں جس سے پاکستان سمیت دنیا کی کئی طاقتور اور سیاسی شخصیات کے مالی معاملات سب پر آشکار ہوئے تھے۔ ان دستاویزات میں سعودی عرب کے شاہ سلمان، آئس لینڈ کے وزیراعظم، روس کے صدر ولادی میر پیوٹن، شام کے صدر اور پاکستان کے سابق وزیراعظم میاں محمد نواز شریف سمیت درجنوں حکمرانوں کے ناموں کا انکشاف کیا گیا تھا۔ آئس لینڈ کے وزیر اعظم نے تفصیلات منظر عام پر آنے کی وجہ سے اپنے عہدے سے استعفیٰ دے دیا تھا اور پاکستان میں پاناما لیکس کے تحت ہی شریف خاندان پر سپریم کورٹ میں کیس چلا اور اعلیٰ عدالت نے میاں محمد نواز شریف کو نااہل قرار دے دیا جس کی وجہ میاں محمد نواز شریف کو وزارتِ عظمی کے عہدے سے استعفیٰ دینا پڑا۔
