لاہور ( این این آئی)لاہور ہائیکورٹ نے فیڈرل بورڈ آف ریونیو کی اپیل منظور کرتے ہوئے تحریک انصاف کے سیکرٹری جنرل جہانگیرترین کو ایف بی آر کی جانب سے بھجوائے گئے ٹیکس نوٹس بحال کر دئیے۔ گزشتہ روز لاہور ہائیکورٹ کے مسٹر جسٹس شاہد کریم کی سربراہی میں دو رکنی بنچ نے ایف بی آر کی اپیل پر سماعت کی۔ ایف بی آر کے وکیل نے موقف اختیار کیا کہ ان لینڈ ریونیو نے جہانگیر ترین کی 94کروڑ سے زائد زرعی آمدن پر نو کروڑ اکانوے
لاکھ روپے کا ٹیکس عائد کرتے ہوئے ٹیکس وصولی کے نوٹس بھجوائے لیکن جہانگیر ترین کی درخواست پر ان لینڈ ریونیو کے اپیلٹ ٹربیونل نے ٹیکس وصولی کے نوٹس معطل کردئیے۔دوران سماعت جہانگیرترین کے وکیل نے عدالت کو آگاہ کیا کہ ان کی زرعی اراضی ملکیتی نہیں لہٰذا اپیلٹ ٹربیونل کا فیصلہ بحال رکھا جائے۔فاضل عدالت نے فریقین کے دلائل سننے کے بعد اپیل منظور کرتے ہوئے ایف بی آر کی جانب سے بھجوائے گئے ٹیکس نوٹس بحال کر دئیے۔
