اسلام آباد(مانیٹرنگ ڈیسک)وزیرخارجہ خواجہ آصف نے کالعدم تنظیموں سے رابطوں سے متعلق انٹیلی جنس بیورو کی 37 ارکان پارلیمنٹ پر مشتمل مبینہ فہرست کو جعلی قرار دینے کیلئے ازراہ مذاق رکن قومی اسمبلی چوہدری عابد رضاکا نام لے کر کہا کہ اس فہرست کے جعلی ہونے کا واضح ثبوت یہ ہے کہ اس میں چوہدری عابد رضا کا نام نہیں جبکہ مسلم لیگ (ن) کے رکن قومی اسمبلی چوہدری عابد رضا کا کہنا ہے کہ خواجہ آصف نے

فہرست میں موجود ارکان کو غمزدہ اور غصے میں دیکھ کر ان کا غصہ ٹھنڈا کرنے اورپریشانی دور کرنے کیلئے ازراہ مذاق میرا نام لے کر تبصرہ کیا ۔ گزشتہ روز مسلم لیگ (ن) کی پارلیمانی کمیٹی کے اجلاس میں آئی بی کی فہرست میں شامل ناموں والے وہ تمام ارکان غصے میں تھے اور اجلاس میں خوب گرما گرمی بھی ہوئی اس دوران خواجہ آصف نے ہلکے پھلکے انداز میں انٹیلی جنس بیورو کی مبینہ فہرست کی صحت پر تبصرہ کرتے ہوئے کہا کہ اس فہرست کے غلط اور جعلی ہونے کی دلیل یہ ہے کہ اس میں چوہدری عابد رضا کا نام شامل نہیں اگر یہ فہرست اصلی ہوتی تو اس میں چوہدری عابد رضا کانام بھی ہوتاجس پر اجلاس کے شرکاء نے خوب قہقے لگائے اور محظوظ ہوئے ۔ اس معاملے پر آئی این پی نے جب مسلم لیگ(ن) کے رکن قومی اسمبلی چوہدری عابد رضا سے بات کی تو انہوں نے کہا کہ پارلیمانی پارٹی کے اجلاس میں جب آئی بی کی فہرست کا تذکرہ ہوا تو وہ تمام ارکان کافی غصہ کر رہے تھے جن کے نام اس فہرست میں شامل ہیں تو خواجہ آصف نے ان ارکان کی افسردگی دور کرنے کیلئے مزاحیہ انداز میں میرا نام لے کر فہرست پر تبصرہ کیا ۔ عابد رضا نے کہا کہ خواجہ آصف میرے بزرگ ہیں میں نے کبھی ایسی باتوں کی پرواہ نہیں کی ، ہم اللہ کی رضا اور انسانیت کی خدمت کیلئے کام کر تے ہیں ۔انہوں نے کہا کہ انسان گناہ گار ہوتا ہے تاہم اللہ تعالیٰ ہر چیز دیکھ رہا ہے اور روز محشر سب کو اللہ تعالیٰ کے سامنے جوابدہ ہونا ہے۔