اسلام آباد (نیوز ڈیسک) وزیراعلیٰ پنجاب محمد شہباز شریف کی زیر صدارت اجلاس منعقد ہوا جس میں صوبے میں ہارٹیکلچر کے فروغ کیلئے اٹھائے گئے اقدامات اور مختلف تجاویز کا جائزہ لیاگیا۔ وزیراعلیٰ محمد شہبازشریف نے اجلاس سے خطاب کرتے ہوئے کہا کہ پنجاب حکومت ترقیاتی منصوبوں کو ہارٹیکلچر کے ذریعے دیدہ زیب بنانے کے پروگرام پر عمل پیرا ہے۔ پنجاب کے شہروں کو صاف ستھرا اور خوبصورت بنانا ہماری ذمہ داری ہے ، اس کے لئے ٹیم ورک کے طور پر کام کرنا ہے اور کسی بھی کام کو منظم انداز سے کیا جائے تو مثبت نتائج برآمد ہوتے ہیں ،
اس کیلئے متعلقہ اداروں کو محنت کے ساتھ کام کرنا ہوگا۔ انہوں نے کہا کہ ہارٹیکلچر اور لینڈ سکیپنگ سے شہروں کی خوبصورتی میں اضافہ ہوتا ہے۔ لاہور سمیت دیگر شہروں کو ہارٹیکلچر کے ذریعے دیدہ زیب بنانے کے لئے آئندہ چند روز میں جامع پلان پیش کیا جائے اور کمرشل عمارتوں کو ہارٹیکلچر سے خوبصورت بنانے کیلئے سفارشات تیار کی جائیں۔ انہوں نے کہا کہ آؤٹ سورسنگ کامیاب ماڈل ہے اور ہمیں اس ماڈ ل پر عمل کرتے ہوئے شہروں کو ہارٹیکلچر کے ذریعے دیدہ زیب بنانا ہے۔ سیکرٹری جنگلات ، ڈی جی لاہور والڈ سٹی اتھارٹی ، ڈی جی ایل ڈی اے ، کمشنر لاہور ڈویژن، ڈی سی لاہور ، ڈی جی پی ایچ اے اور متعلقہ حکام نے اجلاس میں شرکت کی۔
