اسلام آباد(نیوز ڈیسک)کراچی کے علاقے اختر کالونی میں پریڈی تھانے کے (ایس ایچ او) اعجاز خواجہ کو فائرنگ کرکے قتل کردیا گیا ہے،مقتول پولیس افسر کوگھات لگائے موٹر سائیکل سوار ملزمان نے نشانہ بنایا ۔تفصیلات کے مطابق جمعرات کو نامعلوم موٹر سائیکل سوار ملزمان نے کورنگی روڈ پر اختر کالونی میں ایس ایچ او پریڈی اعجازخواجہ کی گاڑی پر فائرنگ کردی، جس کے نتیجے میں وہ شدید زخی ہوگئے۔ اعجاز خواجہ کو جناح اسپتال منتقل کیا گیا، جہاں وہ دوران علاج دم توڑ گئے۔واقعے کے بعد ملزمان جائے وقوع سے فرار ہونے میں کامیاب ہوگئے جبکہ پولیس کی بھاری نفری نے موقع پر پہنچ کر تفتیش کا آغاز کردیا۔اسپتال ذرائع کے مطابق اعجاز خواجہ کو 3 سے 4 گولیاں سر اور سینے میں لگیں۔وزیر اعلیٰ سندھ سید قائم علی شاہ نے ایس ایچ او پریڈی کے قتل کی شدید مذمت کی جبکہ واقعے کی تحقیقاتی کمیٹی ڈی آئی جی ساو¿تھ کی سربراہی میں قائم کردی گئی۔یاد رہے کہ کچھ روز قبل ہی پریڈی پولیس نے سانحہ بلدیہ ٹاﺅن کے دوسرے ملزم شکیل چھوٹا کو مقابلے کے بعد گرفتار کیا تھا۔واضح رہے کہ کراچی کے ضلع جنوبی کے پریڈی تھانے کے3تھانیداروں اور ایک ڈی ایس پی کو فائرنگ کرکے قتل کیا جاچکا ہے۔پریڈی تھانے کے ڈی ایس پی نواز رانجھا کو 16 اگست 2010 کو ا±س وقت فائرنگ کرکے قتل کیا گیا جب وہ اپنی گاڑی میں ایم اے جناح روڈ سے گزر رہے تھے۔اسی تھانے کے ایک اور ایس ایچ او اسد 9 اپریل 2013 کو ایمپریس مارکیٹ صدر کے قریب اپنی گاڑی میں پراسرار طور پر ہلاک ہوئے۔ پولیس کا کہنا تھا کہ اسد کو ان کے گارڈ نے ہی گولی ماری تھی۔پریڈی تھانے میں تعینات غضنفر کاظمی کو 12 اگست 2014 کو انکل سریا اسپتال کے قریب نامعلوم افراد نے ا±س وقت سر میں گولی مار کر ہلاک کردیا جب وہ تھانے سے گارڈن ہیڈ کوارٹر میں واقع اپنے گھر جارہے تھے جبکہ کراچی کے علاقے اخترکالونی میں فائرنگ سے ہلاک ہونے والے اعجازخواجہ اس تھانے کے چوتھے ایس ایچ او ہیں جنھیں نشانہ بنایا گیا۔پریڈی تھانہ کراچی کا اہم ترین تھانہ ہے، جس کی حدود میں ایمپریس مارکیٹ اور الیکٹرونک مارکیٹ سمیت اہم بازار اور ہوٹل آتے ہیں۔