اسلام آباد(نیوز ڈیسک) سپریم کورٹ نے پنجاب بینک سکینڈل کے سابق صدر اور پانچ سال سے قید مرکزی ملزم ہمیش خان کی ضمانت منظور کرتے ہوئے رہا کرنے کا حکم دیدیا۔ جسٹس انور ظہیر جمالی کی سربراہی میں تین رکنی بنچ نے ہمیش خان کی ضمانت کی درخواست سے متعلق معاملہ کی سماعت کی۔ عدالت میں ملزم کے وکیل نے دلائل دیتے ہوئے کہا کہ پنجاب بینک سکینڈل کے دیگر ملزمان ضمانت پر ہیں جبکہ میرا موکل ہمیش خان پانچ سال سے جیل میں ہے۔ جسٹس انور ظہیر جمالی نے ریمارکس دیئے کہ باقی ملزمان ضمانت پر ر ہا ہوچکے ہیں تو ہمیش خان کو جیل میں رکھنا کیوں ضروری ہے۔ ڈپٹی پراسیکیوٹر نیب نے عدالت کو بتایا کہ تمام ملزمان آپس میں ملے ہوئے ہیں ٹرائل مکمل نہیں ہونے دیا جا رہا۔ جسٹس انور ظہیر جمالی کا کہنا تھا کہ کسی شخص کی آزادی کو غیر معینہ مدت کے لیے سلب نہیں کیا جاسکتا۔ عدالت نے ضمانت منظور کرتے ہوئے سماعت ملتوی کر دی۔یاد رہے پنجاب بینک میں 5سال پہلے 52ارب کا گھپلا سامنے آیا تھا۔