اسلام آباد (مانیٹرنگ ڈیسک) بھارتی آرمی چیف نے پاکستان کو سرجیکل سٹرائیک کی دھمکی دے دی، تفصیلات کے مطابق بھارت کے آرمی چیف بپن راوت نے پاکستان کو نام نہاد سرجیکل سٹرائیک کی دھمکی دے دی ہے۔ بھارت کے دارالحکومت نئی دہلی میں ایک کتاب کی رونمائی کے دوران بھارتی آرمی چیف بپن راوت نے کہاکہ سرجیکل سٹرائیک پاکستان کو ایک پیغام تھا جو ہم دینا چاہتے تھے اور میرے
خیال سے پیغام پاکستان کو سمجھ آ گیا تھا۔ بھارتی آرمی چیف نے دھمکی دیتے ہوئے کہا کہ دوسری طرف یعنی پاکستان کا رویہ ٹھیک نہ ہوا تو ضرورت پڑنے پر سرجیکل سٹرائیک دوبارہ بھی کر سکتے ہیں۔ واضح رہے کہ بھارت نے گزشتہ سال ستمبر میں سرجیکل سٹرائیک کا دعویٰ کیا تھا جسے پاکستان نے مسترد کر دیا تھا اس کے علاوہ انٹرنیشنل میڈیا نے بھی اس سرجیکل سٹرائیک کی قلعی کھول دی تھی۔
