اسلام آباد (مانیٹرنگ ڈیسک) شمالی کوریا عالمی پابندیوں کے باوجود آئے روز میزائل اور ایٹمی تجربات کرنے میں مصروف ہے، تفصیلات کے مطابق تمام تر عالمی پابندیوں اور امریکیوں دھمکیوں کے باوجود شمالی کوریا اپنا ایٹمی پروگرام جاری رکھے ہوئے ہے اور یہی وجہ ہے کہ امریکہ اور جنوبی کوریا کے ساتھ اس کی کشیدگی اپنے عروج پر ہے اور تیسری عالمی جنگ چھڑنے کا واضح امکان پیدا ہو گیا ہے۔

اس حوالے سے اب ایک امریکی جنرل نے خوفناک پیش گوئی کی ہے۔ ڈیلی سٹار کی رپورٹ میں کہا گیا ہے کہ امریکی ائیر فورس کے ریٹائرڈ بریگیڈئیر جنرل روب گیوینز نے شمالی کوریا سے جنگ کے بارے میں خطرناک وارننگ دیتے ہوئے کہا کہ اگر امریکہ کے ساتھ اس کی جنگ چھڑ گئی تو روزانہ 20 ہزار لوگوں کی اموات ہو گی اور جتنے روز یہ جنگ جاری رہے گی اسی تناسب سے مرنے والوں کی تعداد بھی بڑھتی چلی جائے گی۔ چار سال کورین خطے میں تعینات رہنے والے جنرل روب گیوینز نے کہا کہ بہت سے امریکیوں کا خیال ہے کہ شمالی کوریا کے ساتھ تصادم عراق یا افغانستان پر حملوں یا لیبیا اور شام میں جاری آپریشنز کی طرح ہو گا لیکن یہ بالکل غلط ہے، اگر یہ جنگ شروع ہوتی ہے تو اس کے ختم ہونے کی صرف ایک ہی صورت ہو گی اور وہ صرف شمالی کوریا کی شکست ہے اور اس جنگ میں جو نقصان اٹھانا پڑے گا اس کا اندازہ نہیں لگایا جا سکتا۔ انہوں نے کہا کہ میں گارنٹی سے کہہ سکتا ہوں کہ شمالی کوریا یہ جنگ جیتنے کی کوشش کرے گا مگر وہ امریکہ سے جیت نہیں پائے گا۔