اسلام آباد (این این آئی)چیئرمین نیب قمر زمان چوہدری نے کہاہے کہ پاناما کیس فیصلے میں سپریم کورٹ کے حکم پر عملدرآمد کریں گے۔نجی ٹی وی کے مطابق پاناما کیس میں سپریم کورٹ کے فیصلے کی روشنی میں نیب نے شریف خاندان اور اسحاق ڈار کے خلاف ریفرنس کی تیاری شروع کردی ہے جس کیلئے کئی بار شریف خاندان اور

اسحاق ڈار کو طلب کیا گیا تاہم شریف خاندان اور اسحاق ڈار نیسپریم کورٹ میں نظر ثانی درخواست پر فیصلے تک نیب کے سامنے پیش ہونے سے انکار کردیا۔پیر کو چیئرمین نیب قمر زمان چوہدری نے نیب کے نئے ہیڈ کوارٹر کا افتتاح کیا اور اس موقع پر انہوں نے میڈیا سے مختصر گفتگو کی۔ اسلام آباد میں نیب کی نئی کثیر المنزلہ عمارت جدید سہولیات سے آراستہ ہے اس پر ایک ارب 70 کروڑ روپے خرچ ہوئے۔نئی بلڈنگ میں ملزمان کیلئے حوالات بنائی گئی ہے اور اہم کیسز میں ملوث ملزمان کیلئے انویسٹی گیشن سیل بھی قائم ہیں جبکہ پولیس اسٹیشن بھی قائم ہے۔افتتاح کے بعد چیئرمین نیب نے کہاکہ 18 سال سے نیب ہیڈکوارٹرز کے پاس اپنی عمارت ہی نہیں تھی۔

میڈیاسے بات چیت کرتے ہوئے چیئرمین نیب نے پاناما کیس سے متعلق بتایاکہ کیس کے فیصلے میں سپریم کورٹ کے حکم پر عملدرآمد کریں گے۔انہوں نے کہا کہ ریاست اور معاشرے کو مل کر کرپشن کے ناسور کو ختم کرنا ہے ۔انہوں نے بتایا کہ شریف خاندان کے خلاف ریفرنسز 8 ستمبر تک دائر کر لئے جائیں گے۔ ذرائع کے مطابق نیب نے پانامہ کیس میں شریف خاندان کے خلاف ریفرنسز کی تیاری کیلئے جے آئی ٹی کے سابق سربراہ واجد ضیاء اور جے آئی ٹی کے سابق ایک اور رکن کو بطور گواہ بیان ریکارڈ کرنے کے لئے نوٹس جاری کر دیئے واجد ضیاء سمیت دونوں افراد کو 30 اگست کو نیب راولپنڈی میں طلب کیا گیا ہے۔