اسلام آباد (آن لائن) پاکستان تحریک انصاف نے کہاہے کہ نواز شریف کے اشارے پر (ن) لیگ کے حواری عمران خان کو بدنام کرنے کے درپے ہیں لیکن عمران خان نااہلی کیس سمیت ان کو ہر محاذ پر منہ کی کھانا پڑے گی ۔ پاکستان تحریک انصاف کے ترجمان نعیم الحق نے اعجاز چوہدری و دیگر رہنماؤں کے ہمراہ سپریم کورٹ کے باہر میڈیا سے گفتگو کرتے ہوئے کہا کہ نواز شریف کی نااہلی کے بعد اب وہ تحریک انصاف کے چیئرمین کی ساکھ خراب کرنا چاہتے ہیں
اور ان کے تمام حواری اب عمران خان اور تحریک انصاف کے دیگر رہنماؤں کو اخلاقی طورپر بدنام کرنے کی کوشش کررہے ہیں نواز لیگ نے پشاور میں ہماری حکومت کیخلاف بھی سازش شروع کردی ہیں تاکہ اسے عدم استحکام کا شکار بنایا جاسکے تحریک انصاف کے ترجمان نے کہا کہ عمران خان کیخلاف نااہلی میں نواز لیگ کو منہ کی کھانا پڑے گی جیسے پانامہ پر نواز شریف کو منہ کی کھانا پڑی تھی اور اب کٹھ پتلی حکومت بنی ہے جو نواز شریف کے اشاروں پر ناچ رہی ہے عمران خان کیخلاف نواز لیگ کے پاس کوئی ثبوت نہیں اور بہت جلد اس کیس کا فیصلہ بھی آجائے گا انہوں نے کہا کہ اسحاق ڈار نے جھوٹ بولا حقائق چھپانے اور اپنے حلف کی خلاف ورزی کی لہذا ایسے شخص کو دوبارہ وزارت خزانہ دینا قوم کے ساتھ مذاق ہے ہم ملک اور تحریک انصاف کیخلاف نواز لیگ کی سازشیں بے نقاب کرتے رہیں گے اور تحریک انصاف کے رہنماؤں کو بدنام کرنے کی حالیہ سازشوں کی تفصیلات آج جمعہ کو عوام کے سامنے پیش کرینگے اعجاز چوہدری نے کہا کہ عمران خان کیخلاف کیس بے بنیاد ہے اور اب سب واضح ہورہا ہے کہ یہ ساری عمران خان کیخلاف سازش ہے لیکن جس طرح عدالت عظمیٰ میں کیس کی سماعت ہورہی ہے ہمیں امید ہے کہ فتح تحریک انصاف کی ہوگی جبکہ نواز لیگ والے ہمیشہ کی طرح اس بار بھی ہاتھ ملتے رہیں گے ۔
