کراچی (نیوز ڈیسک)این اے 246 میں ہونے والے ضمنی انتخابات میں ایم کیو ایم اور تحریک انصاف کے کارکنان کے درمیان گزشتہ روز شدید تصادم ہوا اوراس کے بعد تحریک انصاف کے امیدوار عمران اسماعیل نے کریم آباد مینا بازار کا دورہ کیا۔ان کی آمد سے قبل ہی علاقے میں ایم کیو ایم کے کارکنان بڑی تعداد میں جمع ہو گئے اور ان کی جانب سے تحریک انصاف کے خلاف شدید مظاہرہ کیا گیا۔اس مظاہرے میں خواتین کی بھی بڑی تعداد نے شرکت کی اور ان کی جانب سے ’ گو عمران گو ‘ کے نعرے بھی لگائے گئے۔
تحریک انصاف کے امیدوار عمران اسماعیل نے اس موقع پر میڈیا سے بات کرتے ہوئے کہا ہے کہ مظاہرین کو اگر الطاف حسین سے پیار ہے تو وہ ضرور کریں لیکن تحریک انصاف کراچی کو بوری بند لاشوں سے آزاد کروانے آئی ہے۔انہوں نے بتایا کہ تحریک انصاف نے اعلان کیا تھا کہ اپنی انتخابی مہم کا آغاز مینا بازار سے کریں گے اور ہماری مہم پر امن ہے۔انہوں نے بتایا کہ وہ ایک دو دن میں کریم آباد کا پھر دورہ کریں گے اور یہاں کے لوگوں سے ملتے رہیں گے۔این اے 246 سے تحریک انصاف کے امیدوار عمران اسماعیل کے اس دورے میں ان کے ساتھ تحریک انصاف کے رہنماءعارف علوی سمیت کارکنان کی بڑی تعداد موجود تھی ۔اس کے علاوہ پولیس کی بھاری نفری بھی ان کے ہمراہ تھی تاکہ کسی بھی ناخوشگور واقعے کے خلاف بروقت کاروائی کی جا سکے۔اس دورے کے دوران عمران اسماعیل نے کریم آباد میں اپنے الکشن آفس کا افتتاح بھی کیا۔