اسلام آباد (مانیٹرنگ ڈیسک) سابق وزیر داخلہ چوہدری نثار علی خان نے شاہد خاقان عباسی کی کابینہ کا حصہ نہ بننے کا فیصلہ کیا ہے، کیپیٹل ٹی وی کے ذرائع کے مطابق چوہدری نثار نے وزارت داخلہ کو خیر باد کہہ دیا ہے، الوداعی خط بھی تحریر کیا ہے، اس خط کے متن میں چوہدری نثار علی خان کہتے ہیں کہ وزارت داخلہ کا یہ تجربہ انتہائی اچھا رہا، وزارت داخلہ کے تمام افسران و اہلکاروں کا ممنون ہوں، یہاں پر ان کے ساتھ بہت اچھا وقت گزرا،

کیپیٹل ٹی وی کے بیورو چیف مرتضیٰ سولنگی نے چوہدری نثار کے بارے میں بات چیت کرتے ہوئے کہا کہ ان کے قریبی ذرائع نے کہنا ہے کہ کل جو کابینہ منتخب ہو گی چوہدری نثار اس کابینہ کا حصہ نہیں بنیں گے، چوہدری نثار پہلے ہی کہہ چکے ہیں کہ اگر کوئی جونیئر وزیراعظم بنیں گے تو وہ ان کے ماتحت کام نہیں کریں گے، اس کے علاوہ چوہدری نثار کے بارے میں یہ خبریں بھی ہیں کہ کل شاید وہ قومی اسمبلی کے اجلاس میں بھی نہ آئیں،مرتضیٰ سولنگی نے کہا کہ نیا وزیر داخلہ کون ہو گا ابھی تک کچھ پتا نہیں، شہباز شریف میاں نواز شریف سے مشاورت کے لیے مری چلے گئے ہیں، اسی مشاورت میں کابینہ کے ارکان کا فیصلہ بھی ہو گا، کابینہ کے کس رکن کے پاس کون سی وزارت ہو گی ابھی اس پر کچھ کہنا قبل از وقت ہو گا، چوہدری نثار نے 27 جولائی کی اپنی پریس کانفرنس میں جو چوہدری نثار نے باتیں کیں وہ سامنے آ رہی ہیں، اس پر مرتضیٰ سولنگی نے کہا کہ وزارت کا ختم ہونا سپریم کورٹ کے فیصلے سے ہوا ہے، وزیراعظم کے جانے کے بعد ساری کابینہ خود بخود ختم ہو گئی، مزید کہا کہ چوہدری نثار قومی اسمبلی کے رکن رہیں گے یا نہیں، میرا خیال ہے ابھی وہ اس بارے میں جلد بازی نہیں کریں گے اور اس امکان کو نظرانداز نہیں کیا جا سکتا کہ جب شہباز شریف منتخب ہو کر وزیراعظم آئیں تو شاید چوہدری نثار ان کی کابینہ کا حصہ ہوں۔