اسلام آباد (مانیٹرنگ ڈیسک) شریف خاندان کیخلاف نیب میں کتنے کیس ہیں؟ 17 سال تک کیا کرتا رہا؟ جے آئی ٹی نے چئیرمین نیب کے ریکارڈ کروائے گئے بیان پر تبصرہ کرتے ہوئے ان کی وضاحت کو مسترد کر دیا۔ تحقیقاتی ٹیم کی حتمی رپورٹ میں شریف خاندان کے نیب میں موجود 28 کیسز کی فہرست شامل ہے۔ اس کے علاوہ جے آئی ٹی رپورٹ میں مزید کہا گیاکہ شریف خاندان کے 2 کیسز ایس ای سی پی اور 2 ایف آئی اے کے پاس بھی ہیں۔
مشترکہ تحقیقاتی ٹیم نے چیئرمین نیب کے ریکارڈ کرائے گئے بیان پر اپنی رپورٹ میں لکھا کہ شریف خاندان کے خلاف 1999-2000ء میں کیسز کا آغاز کیا گیا۔ 1999-2000ء میں شریف خاندان کے خلاف 4 ریفرنسز فائل کیے گئے۔ رپورٹ میں بتایا گیاکہ نیب حکام نے شریف خاندان کے خلاف باقی کیسز پر سنجیدہ کوشش ہی نہیں کی، نیب میں موجود کیسز مختلف وجوہات کی بناء پر زیرالتوا رہے۔ رپورٹ میں مزید کہا گیا کہ ایون فیلڈ پراپرٹیزکے بارے میں پانامہ کیس کے سلسلے میں سپریم کورٹ نے نوٹس لیا۔ جے آئی ٹی کے تجزیے میں نیب کے متعلق کہا گیا کہ وہ 17 سال تک نوازشریف کی جائیداد کا کیس دبا کر بیٹھا رہا۔ ایون فیلڈ پراپرٹیز کا کیس نیب کو 2000ء میں دیا گیا یعنی آج سے 17 سال پہلے۔ رپورٹ میں کہا گیا کہ 17، 18سال میں نیب نے ملزمان کو ایک بار بھی تحقیقات میں شامل نہیں کیا۔ نیب کے ملزمان کو تحقیقات میں شامل نہ کرنے سے مقدمات کمزور ہوئے۔ تحقیقاتی رپورٹ میں مزید کہا گیا کہ چیئرمین نیب کے مطابق انہوں نے مقدمات 10 ماہ میں مکمل کرنے کا ایس اوپی بنایا تھا۔ مشترکہ تحقیقاتی ٹیم نے اپنے تجزیہ میں شریف فیملی کے خلاف مقدمات پر اپیل دائر نہ کرنے کی چیئرمین نیب کی وضاحت کو یکسر مسترد کر دیا۔
