اسلام آباد(این این آئی)پاکستان تحریک انصاف کے رہنما فواد چوہدری نے کہا ہے کہ اگلی سماعت میں دونوں فریقوں کو جے آئی ٹی رپورٹ پر جرح کی اجازت دی جائے گی۔ پیر کو سپریم کورٹ کے باہر میڈیا سے گفتگو ہوئے تحریک انصاف کے ترجمان فواد چوہدری نے کہا کہ اگلی سماعت میں دونوں فریقوں کو جے آئی ٹی رپورٹ پر جرح کی اجازت دی جائے گی،
فریقوں کو ہدایت کی کہ پرانے دلائل دہرائے نہ جائیں ٗہفتے بھر میں نواز شریف کے حوالے سے فیصلہ ہوجائے گا انہوں نے کہا کہ حکمران خاندان منی لانڈرنگ، فراڈ، خفیہ جائیدادیں بنانے اور فوجداری جرائم میں ملوث ہے ۔تحریک انصاف کے رہنما نے کہا کہ عدالت نے مرکزی کیس کے ساتھ مزید تین معاملات کا نوٹس بھی لیا، ایس ای سی پی چیرمین ظفر حجازی کیخلاف فوجداری مقدمہ درج کرنے اور تفتیش کرنے کا حکم دیا کہ کس کے کہنے پر انہوں نے ایس ای پی ریکارڈ میں ٹمپرنگ کی ۔فواد چوہدری نے کہاکہ اگلی تاریخ تک عدالت کو حتمی رپورٹ پیش کی جائے گی، عدالت نے کہا ہے کہ ظفر حجازی فراڈ کے مرتکب ہوئے۔فواد چوہدری نے کہا کہ سیاسی احتجاج دہشت گردی نہیں ہوتا ٗاسلام آباد میں 2014 کے دھرنے کے دوران عمران خان، طاہر القادری اور کارکنوں کے خلاف درج کردہ مقدمات کو ہم دہشت گردی کا کیس تسلیم نہیں کریں گے، عمران خان پہلے بھی بنی گالا میں تھے آج بھی بنی گالا میں ہیں جسے شوق ہے جاکر انہیں گرفتار کرلے۔
