ممبئی(آئی این پی) اداکار سہیل خان نے بھی سلمان خان کے جنگ کیخلاف بیان کی حمایت کردی، کہتے ہیں کسی سے بھی پوچھیں وہ جنگ کو برا ہی کہے گا۔بھارتی ذرائع ابلاغ کے مطابق اداکار سہیل خان نے سلمان خان کے فلم ’’ٹیوب لائٹ‘‘ کی تشہیر کے دوران جنگ کیخلاف خیالات کے اظہار پر حمایت کرتے ہوئے کہا ہے کہ جنگ ایک بری چیز ہے اور یہی سلمان کہنا چاہتے تھے۔وہ بولے کہ لوگوں کو اداکاروں کی طرف سے ایسے تبصروں کو اہمیت نہیں دینی چاہئے
کیونکہ انٹرٹینمنٹ انڈسٹری کے لوگوں کو سیاست سے متعلق گہری معلومات نہیں ہیں۔سلمان خان نے فلم ’ٹیوب لائٹ‘ کی تشہیری مہم کے دوران ایک سوال کے جواب میں کہا تھا کہ وہ جنگ کے حق میں نہیں، تنازعات کا حل محض مذاکرات کی میز پر بیٹھ کر ہی نکالا جاسکتا جس پر سلمان خان کے بیان پر بھارت میں کچھ حلقوں نے شدید احتجاج کیا اور ٹویٹر پر انہیں تنقید کا نشانہ بنایا جارہا ہے۔
