ممبئی(این این آئی) بالی ووڈ کے مسٹرپرفکشنسٹ عامر خان کی فلم ’’دنگل‘‘ نے چین کے صدر شی جن پنگ کو بھی اپنا مداح بنالیا۔بالی ووڈ اسٹار عامر خان کی فلمیں انڈیا سے باہر زیادہ بزنس کرتی ہیں جس کی واضح مثال ’’دنگل‘‘ ہے جس نے چین میں تہلکہ مچاتے ہوئے اگلے پچھلے سارے ریکارڈ اپنے قبضے میں کرلیے اور صرف چین میں ایک ہزار کروڑ کا ریکارڈ بزنس کرکے پہلی بھارتی فلم ہونے کا بھی اعزاز اپنے نام کرلیا۔
بھارت کے بعد چین میں فلم ’’دنگل‘‘ کو پسند کیے جانے کی وجہ عامر خان کے ساتھ فلم کی کہانی ہے جو خواتین کو بااختیار بنانے کا پیغام دیتی ہے اور اسی وجہ سے چین کے لوگ اس فلم کو بے حد پسند کررہے ہیں تاہم مسٹر پرفیکشنسٹ کی فلم ’’دنگل‘‘ نے چینی صدر کو بھی ان کا مداح بنالیا۔بھارتی میڈیا رپورٹس کے مطابق چین کے صدر شی جن پنگ نے بھی عامر خان کی فلم دیکھی جس کا تذکرہ انہوں نے گزشتہ روز قازقستان کے دارالحکومت آستانہ میں شنگھائی تعاون تنظیم کے اجلاس کے موقع پر بھارتی وزیراعظم نریندر مودی سے ملاقات میں کیا۔ چینی صدر نے فلم کی تعریف کرتے ہوئے کہا کہ چین میں فلم ’دنگل‘ کی کامیابی کا سفر جاری ہے ٗ انہوں نے خود بھی یہ فلم دیکھی جو انہیں بے حد پسند آئی۔
