اسلام آباد (آئی این پی) وزیراعظم میاں نواز شریف کی صدارت میں سکیورٹی سے متعلق اعلیٰ سطح اجلاس ہوا‘ اجلاس میں آرمی چیف جنرل قمر جاوید باجوہ ‘ وزیراعلیٰ پنجاب شہباز شریف‘ وزیر داخلہ چوہدری نثار علی خان ‘ وزیر خزانہ اسحاق ڈار سمیت اعلیٰ سول اور عسکری حکام نے شرکت کی۔ اجلاس میں آپریشن ردالفساد پر پیش رفت اور کامیابیوں کا جائزہ لیا گیا‘ وزیراعظم نے پاک فوج اور سکیورٹی اداروں کی جانب سے پیش
رفت پر اظہار اطمینان کرتے ہوئے ہدایت کی کہ آپریشن کی رفتار مزید تیز کی جائے۔ پیر کو زیراعظم میاں نواز شریف کی صدارت میں سکیورٹی سے متعلق اعلیٰ سطح اجلاس ہوا۔ اجلاس میں آپریشن ردالفساد پر پیش رفت اور کامیابیوں کا جائزہ لیا گیا۔ وزیراعظم نے پاک فوج اور سکیورٹی اداروں کی جانب سے پیش رفت پر اظہار اطمینان کرتے ہوئے ہدایت کی کہ آپریشن کی رفتار مزید تیز کی جائے۔ اجلاس میں اس بات پر اتفاق کیا گیا کہ دہشت گردی اور انتہا پسندی کا خاتمہ ملکی سلامتی کے لئے ناگزیر ہے۔ امن اور ترقی کے دشمنوں کو ملک میں سلامتی کی صورتحال ہرگز خراب نہیں کرنے دیں گے۔ نیشنل ایکشن پلان پر عمل درآمد کے لئے کوششیں مزید تیز کی جائیں گی۔ وفاقی اور صوبائی حکومتیں نیشنل ایکشن پلان پر موثر عمل درآمد یقینی بنائیں گی۔ اجلاس میں انسداد دہشت گردی کے حوالے سے قوانین اور پاک افغان سرحد پر موثر انتظام سے متعلق انتظامات کا بھی جائزہ لیا گیا۔ اجلاس میں انسداد دہشت گردی قوانین کو مزید موثر بنانے پر بھی تبادلہ خیال کیا گیا۔ اجلاس کے شرکاء نے سکیورٹی اداروں اور عوام کی قربانیوں کو زبردست خراج تحسین پیش کیا۔ اجلاس میں آرمی چیف جنرل قمر جاوید باجوہ ‘ وزیراعلیٰ پنجاب شہباز شریف‘ وزیر داخلہ چوہدری نثار علی خان ‘ وزیر خزانہ اسحاق ڈار‘ مشیر خارجہ سرتاج عزیز‘ قومی سلامتی کے مشیر ناصر جنجوعہ‘ ڈی جی آئی ایس آئی سمیت اعلیٰ سول اور عسکری حکام نے شرکت کی
