اسلام آباد(مانیٹـرنگ ڈیسک)آرمی چیف جنرل قمر جاوید باجوہ سے پی ایس ایل 2 کی چیمپئن ٹیم پشاورزلمی کی ملاقات ،آرمی چیف کی جانب سے ٹیم کو جیت پر مبارکباد۔آئی ایس پی آر کے مطابق پی ایس ایل چیمپئن ٹیم پشاورزلمی نے آرمی چیف جنرل قمر جاوید باجوہ سے ملاقات کی، ملاقات میں آرمی چیف جنرل قمرجاوید باجوہ نے پشاورزلمی کی ٹیم سمیت انتظامیہ کوجیت پرمبارکباد دی۔
ملاقات میں آرمی چیف نے غیرملکی کھلاڑیوں کا شکریہ ادا کرتے ہوئے کہا کہ پاکستان میں کرکٹ واپس لانے پر پی ایس ایل کی تمام ٹیموں اورانتظامیہ کی کوششیں لائق تحسین ہیں، پاکستان کھیلوں سے محبت کرنے والا ایک پرامن ملک ہے، کرکٹ پاکستانیوں کاپسندیدہ ترین کھیل ہے جوقوم کو متحد رکھتا ہے۔ آرمی چیف نے کھلاڑیوں کو نصیحت کرتے ہوئے کہا کہ’’ آگے بڑھتے رہیں اورملک کا نام روشن کریں‘‘ ۔زلمی کی ٹیم اورانتظامیہ نے تعاون پرآرمی چیف کا شکریہ ادا کیا اور یقین دہانی کرائی کہ ہم پاک فوج کے شانہ بشانہ کھڑے ہیں۔ اس موقع پر پشاور زلمی کے مالک جاوید آفریدی سمیت ٹیم مینجمنٹ اور کھلاڑی موجود تھے۔
