لاہور(این این آئی)پاکستان سپر لیگ کے اہم میچ میں پشاور زلمی کی طرف سے سنچری سکور کرنے والے کامران اکمل نے کہا ہے کہ چیئرمین کرکٹ بورڈ نے ملاقات میں کہا تھا میں پرفارمنس دیتا رہوں مجھے ضرور موقع ملے گا،چیف سلیکٹر سے بھی کراچی میں چار روزہ میچ کے دوران ملا تھا اور اس سیزن میں میری کارکردگی سب کے سامنے ہے۔ایک انٹر ویو میں کامران اکمل نے کہا کہ مجھے یقین ہے کہ میری جلد پاکستانی
ٹیم میں واپسی ہوگی۔میں گزشتہ دو ،تین سال سے ڈومیسٹک کرکٹ میں اچھی کارکردگی کا مظاہرہ کررہا ہوں لیکن اب یہ سلیکٹرز پر منحصر ہے کہ وہ مجھے ٹیم میں منتخب کرتے ہیں یا نہیں اس کا جواب تو وہی دے سکتے ہیں۔انہوں نے ایک سوال کے جواب میں کہا کہ ٹیم سے ڈراپ کیے جانے پر دلبرداشتہ تو تھا لیکن میں حوصلہ نہیں ہارا اور میری فیملی نے میرا بہت ساتھ دیا۔میرے لیے ٹیم میں واپسی کا ایک ہی راستہ رہا ہے کہ ڈومیسٹک کرکٹ میں اچھی کارکردگی دکھاؤں اور وہ میں دکھا رہا ہوں۔کامران اکمل نے کہا کہ سب دیکھ رہے ہیں کہ میں ٹی ٹونٹی میں کس نمبر پر بیٹنگ کررہا ہوں۔ ڈومیسٹک کرکٹ ون ڈے میں کس نمبر پر کھیل رہا ہوں۔ مجھے صرف یہ معلوم ہے کہ مجھے پرفارم کرنا ہے مجھے کس نمبر پر مجھے کھلایا جاسکتا ہے اس کا فیصلہ سلیکٹرز کریں گے۔ کامران اکمل نے کہا کہ مجھے خوشی ہے کہ میری سنچری کی بدولت ان کی ٹیم فائنل میں پہنچی ہے ۔
