اسلام آباد (نیوز ڈیسک)قومی ادارہ صحت کی پولیو وائرلوجی لیبارٹری میں مزید دو نئے پولیو کیسز کی تصدیق ہوگئی ہے جس کے بعد رواں برس ان کی تعداد اٹھارہ تک پہنچ گئی ہے۔وزارت نیشنل ہیلتھ سروسز کے ایک عہدیدار کے مطابق یہ کیسز فاٹا اور سندھ میں سامنے آئے ہیں۔یہ نئے کیسز موسم سرما میں رپورٹ ہوئے ہیں حالانکہ ان ایام میں پولیو وائرس عام طور پر کم درجہ حرارت کی بناء4 پر کم متحرک ہوتا ہے۔لیبارٹری کی رپورٹ کے مطابق پہلا واقعہ سندھ کے ضلع سکھر کے چوہان گاؤں کے رہائشی اٹھارہ ماہ کے بچے عذیر حسین میں رپورٹ ہوا ہے۔بچے کے والدین نے بتایا کہ لڑکے کو کم از کم نو بار پولیو ویکسین پلائی گئی تھی۔زندگی بھر کے لیے معذور بنادینے والے اس مرض کا شکار بننے والی دوسری بچی ریشم ولد حمید گل ہے۔لیبارٹری کی رپورٹ کے مطابق سولہ ماہ کی یہ بچی خیبر ایجنسی کی تحصیل باڑہ کی رہائشی ہے۔
اس کے والدین کا کہنا ہے کہ بچی کو تین بار معمول کی مہموں کے دوران انسداد پولیو ویکسین پلائی گئی۔رواں برس اب تک سات پولیو کیسز خیبرپختونخوا، چھ فاٹا، تین سندھ اور دو بلوچستان میں سامنے آئے ہیں، جبکہ پنجاب اور گلگت بلتستان میں کوئی کیس رپورٹ نہیں ہوا۔خیال رہے کہ عالمی ادارہ صحت نے حال ہی میں پاکستان پر عائد عالمی سفری پابندیوں کی مدت میں مزید تین ماہ کی توسیع کردی تھی۔