ایک دن صحابہ کرام کے اجتماع میں نبی اکرم ﷺ تشریف فرما تھے فجر کی نماز ہو چکی تھی۔ وعظ و نصیحت کا سلسلہ جاری تھا کہ حضور ﷺ نے فرمایا ” تم میں سے کون ایسا شخص ہے جو مجھ سے چند باتیں اچھی طرح سیکھ لے پھر ان پر عمل بھی کرے اور دوسروں کو ان کی تعلیم بھی دے؟ حضرت ابوہریرہ ؓ فوراً کھڑے ہو گئے اور عرض کیا یا رسول اللہ ﷺ میں حاضر ہوں مجھے آپ ان باتوں کی تعلیم دیں میں ان پر عمل کروں گا اور لوگوں کو ان کی تعلیم بھی دوں گا۔حضرت ابوہریرہؓ کا بیان ہے کہ حضور ﷺ نے میرا ہاتھ پکڑا اور پانچ کلمات ارشاد فرمائے۔ فرمایا۔ حرام سے بچنا تم سب سے بڑے عابد بن جاؤ گے۔ اللہ تعالیٰ کی طرف سے جو بھی تمہیں مل جائے اس پر راضی ہو جاتا تم سب سے زیادہ غنی ہو جاؤ گے۔ اپنے پڑوسی سے حسن سلوک کرنا تم حقیقی معنوں میں مومن بن جاؤ گے۔ جو اپنے لیے پسند کرتے ہو وہی دوسروں کے لیے بھی پسند کرنا تم سچے مسلمان بن جاؤ گے۔ زیادہ نہ ہنسنا ورنہ تمہارا دل مردہ ہو جائے گا۔ ترمذی شریف کی حدیث میں ہے کہ حضرت ابوہریرہ رضی اللہ عنہ، نے ان باتوں کو سنا پھر لوگوں تک پہنچایا۔